അമേരിക്കയില് പിടിമുറുക്കി അതിശൈത്യം. തെക്കന് ന്യൂയോര്ക്കിലെ ബഫലോയില് ഹിമപാതത്തില് 28 പേര് മരിച്ചതായാണ് റിപ്പോര്ട്ട്. എട്ടടി ഉയരത്തിലേറെ മഞ്ഞ് മൂടിക്കിടക്കുന്നതിനാല് ഇവിടേക്കുള്ള രക്ഷാപ്രവര്ത്തനം പൂര്ണമായും നിലച്ചു. ഇതിനാല് നഗരം തികച്ചും ഒറ്റപ്പെട്ട സ്ഥിതിയിലായി.
ജനങ്ങള്ക്ക് സഹായം എത്തിക്കാനാകാത്ത സ്ഥിതിയായിരുന്നുവെന്നും യുദ്ധ മേഖലയില് പ്രവേശിക്കുന്ന പ്രതീതിയാണ് അടിയന്തര സര്വീസ് വാഹനങ്ങള്ക്കുണ്ടായതെന്നും ന്യൂയോര്ക്ക് ഗവര്ണര് അറിയിച്ചു. ശീതക്കാറ്റിനെത്തുടര്ന്ന് വൈദ്യുതി വിതരണം തടസ്സപ്പെട്ടത് ജനങ്ങളെ കൂടുതല് ദുരിതത്തിലാഴ്ത്തി .
15 ലക്ഷത്തോളംപേര് വൈദ്യുതിയില്ലാതെ കഷ്ടപ്പെടുകയാണ്. അതിശൈത്യത്തില് മരണം 60 കടന്നെന്നാണ് വിവരം. കിഴക്കന് മേഖലകളില് മാത്രമല്ല അടുത്തടുത്ത് സ്ഥിതി ചെയ്യുന്ന അമേരിക്കയിലെ 48 സംസ്ഥാനങ്ങളിലും താപനില കുത്തനെ താഴ്ന്ന നിലയിലാണ്. വീടുകളും വാഹനങ്ങളുമെല്ലാം മഞ്ഞുമൂടി കഴിഞ്ഞു.
കാലാവസ്ഥ മോശമായതിനെ തുടര്ന്ന് വിമാന സര്വീസുകള് റദ്ദാക്കിയതോടെ വിനോദസഞ്ചാരികളില് പലരും നാട്ടിലേക്ക് മടങ്ങാനാവാതെ കുടുങ്ങിയിരിക്കുകയാണ്.