ലോകത്തിലെ ഏറ്റവും പ്രായം കുറഞ്ഞ യോഗ ഇൻസ്ട്രക്ടർ എന്ന റെക്കോർഡ് സ്വന്തമാക്കി ഇന്ത്യക്കാരൻ. മാതാപിതാക്കൾക്കൊപ്പം ദുബായിൽ സ്ഥിരതാമസമാക്കിയ പത്ത് വയസ്സുകാരൻ റെയൻഷ് സുരാനിയാണ് ലോകത്തിലെ ഏറ്റവും പ്രായം കുറഞ്ഞ യോഗ ഇൻസ്ട്രക്ടർ എന്ന റെക്കോർഡ് സ്വന്തമാക്കിയത്.
2021 ലാണ് റെയൻഷിന് റെക്കോർഡ് ലഭിച്ചത്. അഞ്ച് വയസു മുതൽ തന്നെ റെയൻഷ് യോഗയിൽ താത്പര്യം പ്രകടിപ്പിച്ചിരുന്നു എന്ന് അമ്മ ആഷ്ന സുരാനി പറയുന്നു. അധ്യാപകരുടെയും മാതാപിതാക്കളുടെയും പിന്തുണ കൂടി ലഭിച്ചതോടെ റെയൻഷ് യോഗയിൽ കൂടുതൽ ശ്രദ്ധിച്ചെന്നും വളരെ വേഗം സ്വായത്തമാക്കിയെന്നും അമ്മ പറഞ്ഞു.
തുടർന്ന് യോഗ ക്ലാസുകൾ ആരംഭിച്ച റെയൻഷിൻ്റെ സ്വപ്നം പ്രധാനമന്ത്രി നരേന്ദ്ര മോദിക്കൊപ്പം യോഗ ചെയ്യുക എന്നതാണ്. തന്നിൽ നിന്ന് യോഗ പഠിക്കുന്ന പല സുഹൃത്തുക്കളും യോഗ ആസ്വദിക്കുന്നുണ്ടെന്ന് കുട്ടി ഇൻസ്ട്രക്ടർ പറയുന്നു.
പ്രായഭേദമന്യേ നിരവധിയാളുകൾ റെയൻഷിന്റെ സ്റ്റുഡൻസ് ലിസ്റ്റിലുണ്ട്. ചില ആളുകൾ കുറച്ചു നാൾ യോഗ ചെയ്തിട്ട് മറ്റെന്തിലേക്കെങ്കിലും ശ്രദ്ധ തിരിക്കും. പക്ഷേ അവർ ഈ പ്രായത്തിലും യോഗയെപ്പറ്റി അറിഞ്ഞതിൽ തനിക്ക് സന്തോഷമുണ്ടെന്നും റെയൻഷ് പറയുന്നു.