ഉന്നാവോ കാറപകടത്തിന് പിന്നില് കുല്ദീപ് സിങ് സെന്ഗാര് ആണെന്ന് പെണ്കുട്ടിയുടെ മൊഴി പുറത്ത്.അപകടത്തിന് തൊട്ട് മുമ്പ് തന്നെ സെന്ഗാറും കൂട്ടാളികളും തന്നെ ഭീഷണിപ്പെടുത്തിയിരുന്നെന്നും പെണ്കുട്ടി മൊഴി നല്കിയിട്ടുണ്ട്.എന്നാൽ, അഭിഭാഷകന്റെ ആരോഗ്യനിലയിൽ പുരോഗതി ഇല്ലാത്തതിനാൽ മൊഴി രേഖപ്പെടുത്താൻ കഴിഞ്ഞിട്ടില്ല.
കഴിഞ്ഞ ദിവസമാണ് സി.ബി.ഐ പെണ്കുട്ടിയുടെ മൊഴി രേഖപ്പെടുത്തിയത്. അത്യാസന്നനിലയില് ഡല്ഹി എയിംസിലെ തീവ്ര പരിചരണ വിഭാഗത്തില് ആയിരുന്ന പെണ്കുട്ടിയെ കഴിഞ്ഞദിവസം വാര്ഡിലേക്കു മാറ്റിയിരുന്നു. തുടര്ന്ന് സി.ബി.ഐ പെണ്കുട്ടിയുടെ മൊഴി രേഖപ്പെടുത്തുകയായിരുന്നു.
അതേസമയം ഉന്നാവോ പീഡന കേസ് സുപ്രിം കോടതി ഇന്ന് പരിഗണിക്കും. വാഹനാപകടക്കേസിന്റെ അന്വേഷണ പുരോഗതി അറിയിക്കാൻ സി.ബി.ഐയ്ക്ക് കഴിഞ്ഞ തവണ ജസ്റ്റിസ് ദീപക് ഗുപ്ത അധ്യക്ഷനായ ബെഞ്ച് നിർദേശം നൽകിയിരുന്നു. ഉന്നാവോ പീഡനവുമായി ബന്ധപ്പെട്ട അഞ്ച് കേസുകളിലെ വിചാരണയുടെ പുരോഗതിയും എന്ന് വിചാരണ പൂർത്തിയാക്കാൻ കഴിയുമെന്ന കാര്യവും അറിയിക്കാൻ ഡൽഹി പ്രത്യേക കോടതി ജഡ്ജി ധർമേഷ് ശർമയ്ക്കും നിർദേശമുണ്ട്.
വാഹനാപകടക്കേസിൽ അന്വേഷണം പൂർത്തിയാക്കാൻ കൂടുതൽ സമയം വേണമെന്ന് സി.ബി.ഐ ഇന്ന് കോടതിയിൽ ആവശ്യപ്പെട്ടേക്കും.
ജൂലൈ 28 നായിരുന്നു ഉന്നാവോ പെണ്കുട്ടി സഞ്ചരിച്ച വാഹനം അപകടത്തില്പ്പെട്ടത്. ഉന്നാവോയില് നിന്നും റായ്ബറേലിയിലേക്ക് പോയികൊണ്ടിരിക്കെ വാഹനം ട്രക്കില് ഇടിച്ചാണ് അപകടം ഉണ്ടായത്. പെണ്കുട്ടിയും കുടുംബവും സഞ്ചരിച്ച കാറിലിടിച്ച ട്രക്കിന് നമ്പര് പ്ലേറ്റ് ഇല്ലായിരുന്നുവെന്ന റിപ്പോര്ട്ടും പുറത്തുവന്നിരുന്നു.
കേസില് അന്വേഷണം നേരിടുന്ന ബി.ജെ.പി എം.എല്.എ കുല്ദീപ് സിങ് സെന്ഗറിനെ ബി.ജെ.പി സസ്പെന്റ് ചെയ്തിരുന്നു.
2017ല് ജോലി വാഗ്ദാനവുമായി ബന്ധപ്പെട്ട് കാണാനെത്തിയ, അന്ന് 17 വയസ് പ്രായമുണ്ടായിരുന്ന പെണ്കുട്ടിയെ എം.എല്.എ അടക്കമുള്ളവര് ചേര്ന്ന് ലൈംഗികമായി ആക്രമിക്കുകയായിരുന്നു. പരാതി നല്കിയിട്ടും നടപടി എടുക്കാത്തതിനെ തുടര്ന്ന് യോഗി ആദിത്യനാഥിന്റെ വസതിയ്ക്ക് മുന്നില് പെണ്കുട്ടിയും അമ്മയും തീകൊളുത്താനും ശ്രമിച്ചിരുന്നു.