ബംഗളൂരുവില്‍ പ്രായപൂര്‍ത്തിയാകാത്ത മകളെ ശല്യം ചെയ്ത യുവാവിനെ ചോദ്യം ചെയ്യവേ പിതാവിനെ കുത്തിക്കൊലപ്പെടുത്തി. അശോക് നഗര്‍ പൊലീസ് സ്റ്റേഷന്‍ പരിധിയിലെ ശാന്തി നഗറിലാണ് ഡ്രൈവറായ അന്‍വര്‍ ഹുസൈന്‍ കൊല്ലപ്പെട്ടത്. കൃത്യത്തിന് ശേഷം ഒളിവില്‍ പോയ പ്രതി സഹീദിനെ പൊലീസ് അറസ്റ്റ് ചെയ്തു.
ഇരുവരും ശാന്തി നഗറിലെ നഞ്ചപ്പ സര്‍ക്കിളിലെ താമസക്കാരാണ്. അന്‍വര്‍ ഹുസൈന്റെ പ്രായപൂര്‍ത്തിയാകാത്ത മകളെ സഹീദ് നിരന്തരമായി ശല്യം ചെയ്തിരുന്നു. സ്‌കൂള്‍ വിദ്യാര്‍ത്ഥിനിയായ പെണ്‍കുട്ടി ഇക്കാര്യം പിതാവിനെ അറിയിച്ചു. സഹീദിന് അന്‍വര്‍ ഹുസൈന്‍ പലകുറി താക്കീത് നല്‍കിയിട്ടും ഇയാള്‍ പെണ്‍കുട്ടിയെ ശല്യം ചെയ്യുന്നത് തുടര്‍ന്നു.
ശനിയാഴ്ചയും ഇയാള്‍ പെണ്‍കുട്ടിയെ ശല്യം ചെയ്തു. ഇത് ചോദ്യം ചെയ്യാന്‍ രാത്രി ഒന്‍പതോടെ പെണ്‍കുട്ടിയുടെ മാതാപിതാക്കളും സഹോദരനും സഹീദിന്റെ വീട്ടില്‍ എത്തി. തുടര്‍ന്ന് ഇരു കുടുംബങ്ങളും തമ്മില്‍ നടന്ന തര്‍ക്കത്തിനിടയില്‍ സഹീദ് അന്‍വര്‍ ഹുസൈന്റെ കഴുത്തില്‍ കത്തികൊണ്ട് കുത്തുകയായിരുന്നു. തുടര്‍ന്ന് സഹീദ് സംഭവസ്ഥലത്ത് നിന്ന് ഓടി രക്ഷപ്പെട്ടു. അന്‍വര്‍ ഹുസൈനെ ഉടന്‍തന്നെ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല.