തമിഴ്നാട്ടിലെ മധുരയില് ചിത്തിര ഉത്സവത്തിനിടെയുണ്ടായ തിക്കിലും തിരക്കിലും പെട്ട് രണ്ട് പേര് മരിച്ചു. ഒരു സ്ത്രീയും ഒരു പുരുഷനുമാണ് മരിച്ചത്. തിരക്കില് പെട്ട് നിരവധി പേര്ക്ക് പരിക്കേല്ക്കുകയും ചെയ്തു. തേനി ജില്ലയിയില് നിന്നുള്ള സെല്വന്(40) എന്നയാളാണ് മരിച്ചത്. 60 വയസ് പ്രായം വരുന്ന സ്ത്രീ ആരാണെന്ന് തിരിച്ചറിഞ്ഞിട്ടില്ല.
ഇന്ന് പുലര്ച്ചെയായിരുന്നു സംഭവം. ഉത്സവത്തിന്റെ പ്രധാനപ്പെട്ട ചടങ്ങായ കല്ലഴഗര് ഭഗവാന്റെ വിഗ്രഹം വൈഗ നദിയില് ആറാട്ടിനായി എത്തിച്ചപ്പോഴായിരുന്നു അപകടം. വെഗ നദിയിലേക്കുള്ള പ്രവേശന സമയത്ത് വലിയ ഭക്തജനത്തിരക്കാണ് അനുഭവപ്പെട്ടത്. ജനക്കൂട്ടത്തിനിടയില് കുടുങ്ങി ശ്വാസം മുട്ട് അനുഭവപ്പെട്ട് ചിലര് തലകറങ്ങിവീണു. ഇവരെ ഉടനെ രാജാജി സര്ക്കാര് ആശുപത്രിയില് എത്തിച്ചു.
എന്നാല് ആശുപത്രിയിലേക്കുള്ള വഴിയില് വച്ചാണ് രണ്ട് പേര് മരിച്ചത്. 24 ഓളം പേര്ക്ക് പരിക്കേറ്റിട്ടുണ്ട്. ഇതില് അഞ്ച് പേരുടെ നില ഗുരുതരമാണ്.
മരിച്ചവരുടെ കുടുംബത്തിന് അഞ്ച് ലക്ഷം രൂപയും ഗുരുതരമായി പരിക്കേറ്റവര്ക്ക് രണ്ട് ലക്ഷം രൂപയും ചെറിയ പരിക്ക് സംഭവിച്ചവര്ക്ക് ഒരു ലക്ഷം രൂപ വീതവും ധനസഹായം നല്കുമെന്ന് മുഖ്യമന്ത്രി എം കെ സ്റ്റാലിന് അറിയിച്ചിട്ടുണ്ട്. ഇതിനുള്ള ഫണ്ട് മുഖ്യമന്ത്രിയുടെ ദുരിതാശ്വാസ നിധിയില് നിന്ന് അനുവദിക്കും.
കഴിഞ്ഞ രണ്ട് വര്ഷമോയി കോവിഡ് വ്യാപനം കാരണം ചിത്തിര ഉത്സവം വലിയ ആഘോഷമായി നടത്തിയിരുന്നില്ല. ഈ വര്ഷം ഇളവുകള് അനുവദിച്ചതോടെയാണ് ഉത്സവം പൂര്ണ തോതില് നടത്തിയത്. ഏപ്രില് 12ന് തുടങ്ങിയ പരിപാടിയില് സംസ്ഥാനത്തിന്റെ വിവിധ ഭാഗങ്ങളില് നിന്നുള്ള ആയിരക്കണക്കിന് ആളുകളാണ് എത്തിച്ചേര്ന്നത്.