രാഹുൽ ഗാന്ധിയെയും അസിം മുനീറിനേയും ചേർത്തുള്ള ചിത്രവുമായി ബിജെപി നേതാവ് അമിത് മാളവ്യ. എക്സിൽ പങ്കുവച്ച പോസ്റ്റിലാണ് ഇത്തരത്തിൽ പാതി പാതി ചേർത്ത രണ്ടുപേരുടെയും ചിത്രം ബിജെപി നേതാവ് പുറത്ത് വിട്ടത്. രാഹുൽ സംസാരിക്കുന്നത് പാകിസ്ഥാൻ ഭാഷയെന്ന് ബിജെപി നേതാവ് അമിത് മാളവ്യ ആരോപിച്ചു.
എത്ര ഇന്ത്യൻ വിമാനങ്ങൾ നഷ്ടപ്പെട്ടുവെന്ന് ചോദിക്കുന്ന രാഹുലിന് പാക് വിമാനങ്ങളെ കുറിച്ച് മിണ്ടാട്ടമില്ലെന്നും പോസ്റ്റിൽ അമിത് മാളവ്യ പറയുന്നു. പാകിസ്ഥാന്‍റെ പരമോന്നത ബഹുമതിയായ നിഷാൻ ഇ പാകിസ്ഥാനാണോ രാഹുലിന്‍റെ ലക്ഷ്യമെന്നും അമിത് മാളവ്യ പരിഹസിച്ചു. രാഹുലിന്‍റേറെയും അസിം മുനീറിന്‍റേയും മുഖം ചേർത്തുള്ള ചിത്രവും അമിത് മാളവ്യ പുറത്ത് വിട്ടു.
‘രാഹുൽ ഗാന്ധി പാകിസ്ഥാന്റെയും അതിന്റെ ഗുണഭോക്താക്കളുടെയും ഭാഷയിൽ സംസാരിക്കുന്നതിൽ അതിശയിക്കാനില്ല. ഇന്ത്യയുടെ ആധിപത്യം വ്യക്തമായി പ്രകടമാക്കുന്ന #OperationSindoor എന്ന കുറ്റമറ്റ പദ്ധതിക്ക് പ്രധാനമന്ത്രിയെ അദ്ദേഹം അഭിനന്ദിച്ചിട്ടില്ല. പകരം, നമുക്ക് എത്ര ജെറ്റുകൾ നഷ്ടപ്പെട്ടു എന്ന് അദ്ദേഹം ആവർത്തിച്ച് ചോദിക്കുന്നു – DGMO ബ്രീഫിംഗുകളിൽ ഇതിനകം തന്നെ ഈ ചോദ്യം പരാമർശിച്ചിട്ടുണ്ട്. കൗതുകകരമെന്നു പറയട്ടെ, സംഘർഷത്തിനിടെ എത്ര പാകിസ്ഥാൻ ജെറ്റുകൾ വെടിവച്ചു വീഴ്ത്തിയെന്നോ, ഇന്ത്യൻ സൈന്യം പാകിസ്ഥാൻ വ്യോമതാവളങ്ങൾ ആക്രമിച്ചപ്പോൾ എത്രയെണ്ണം അവയുടെ ഹാംഗറുകളിൽ നിർത്തിയിട്ടിരിക്കെ നശിപ്പിക്കപ്പെട്ടെന്നോ അദ്ദേഹം ഒരിക്കൽ പോലും അന്വേഷിച്ചിട്ടില്ല.’- അമിത് മാളവ്യ കുറിച്ചു
