സോഷ്യല് മീഡിയയില് ചിത്രം പങ്കുവച്ച ഭാര്യയെയും ഭാര്യ മാതാവിനെയും വെട്ടിക്കൊലപ്പെടുത്തിയ പ്രതി പിടിയില്. ത്രിപുരയിലെ അഗര്ത്തലയിലാണ് സംഭവം നടന്നത്. പ്രതി നേരത്തെ ഭാര്യയുമായി പിരിഞ്ഞ് താമസിക്കുകയായിരുന്നു. ഇയാളുടെ ഭാര്യ പടിഞ്ഞാറന് നേതാജി നഗറില് അമ്മയോടൊപ്പമാണ് താമസിച്ചിരുന്നത്.
കഴിഞ്ഞ ദിവസം നടന്ന ദുര്ഗാ പൂജ ആഘോഷങ്ങള്ക്കിടെ രണ്ട് ആണ്സുഹൃത്തുക്കള്ക്കൊപ്പമുള്ള ചിത്രം കൊല്ലപ്പെട്ട യുവതി സോഷ്യല് മീഡിയയില് പങ്കുവച്ചിരുന്നു. ഇതായിരുന്നു പ്രതിയുടെ പ്രകോപനത്തിന് കാരണമായത്. പ്രതി തന്റെ രണ്ട് ആണ്മക്കള്ക്കൊപ്പം മധുപൂരിലാണ് താമസിച്ചുവന്നിരുന്നത്.
സോഷ്യല് മീഡിയയിലെ ചിത്രം കണ്ട് പ്രകോപിതനായ പ്രതി ദുര്ഗാ പൂജ ആഘോഷങ്ങള് കഴിഞ്ഞ് മടങ്ങിയ ഭാര്യയെയും ഭാര്യ മാതാവിനെയും മൂര്ച്ചയേറിയ ആയുധം ഉപയോഗിച്ച് ആക്രമിക്കുകയായിരുന്നു. ഇരുവരും സംഭവ സ്ഥലത്ത് തന്നെ കൊല്ലപ്പെട്ടു. തുടര്ന്ന് പൊലീസ് പ്രതിയെ പിടികൂടുകയായിരുന്നു.