ഇന്ഷുറന്സ് തുക തട്ടിയെടുക്കാനായി കാര് കത്തിച്ച് പൊലീസില് പരാതി നല്കിയ ബിജെപി ജില്ലാ സെക്രട്ടറി അറസ്റ്റില്. ബിജെപി തിരുവള്ളൂര് വെസ്റ്റ് ജില്ലാ സെക്രട്ടറി സതീഷ് കുമാര് (48) ആണ് അറസ്റ്റിലായത്.
ഈ മാസം 14ന് രാത്രിയിലായിരുന്നു സംഭവം. ചെന്നൈ മധുരവായല് കൃഷ്ണാനഗറിലെ വീടിനുമുന്നില് നിര്ത്തിയിട്ട കാര് കത്തിക്കുകയും എന്നാല് മറ്റാരോ കത്തിച്ചതാണെന്ന തരത്തില് കുടുംബം പരാതി നല്കുകയുമായിരുന്നു. പിന്നീട് പൊലീസ് സിസിടിവി ദൃശ്യങ്ങള് പരിശോധിച്ചപ്പോഴാണ് സംഭവം പുറത്തുവന്നത്.
വെള്ള ഷര്ട്ടണിഞ്ഞയാള് എത്തി വാഹനം പരിശോധിക്കുന്നതായി സിസിടിവി ദൃശ്യത്തില് വ്യക്തമാണ്. പിന്നീട് ഇരുണ്ട നിറത്തിലുള്ള വസ്ത്രം ധരിച്ചയാള് എത്തുകയും കാറിനുചുറ്റും എന്തോ ഒഴിക്കുന്നതുപോലെയും കാണാം. പിന്നീട് നിമിഷങ്ങള്ക്കകം കാര് ആളിക്കത്തുകയും വീടുകളില് നിന്ന് ആളുകള് പുറത്തേക്ക് വരുന്നതും വിഡിയോയില് വ്യക്തമാണ്.