മഹാരാഷ്ട്രയില്‍ നടന്ന ദളിത് പ്രക്ഷോഭത്തില്‍ പാക് പാതാക ഉയര്‍ത്തിയെന്ന സംഘപരിവാറിന്റെ പ്രചരണം പൊളിഞ്ഞു. പ്രക്ഷോഭകാരികള്‍ പച്ചനിറത്തിലുള്ള ഒരു കൊടിയുയര്‍ത്തിപ്പിടിച്ച ചിത്രം ഉയര്‍ത്തിക്കാട്ടിയായിരുന്നു സംഘപരിവാര്‍ സാമൂഹ്യ മാധ്യമങ്ങിലുടെ നുണപ്രചരണം അഴിച്ചുവിട്ടത്. ദളിത് പ്രക്ഷോഭം, പാകിസ്ഥാനി കൊടി, ഇതാണ് യഥാര്‍ത്ഥ കഥ” എന്ന ഒരു കുറിപ്പോടെയായിരുന്നു ചിത്രങ്ങള്‍ പ്രചരിച്ചിരുന്നത്.
പാകിസ്താന്‍ കൊടിയെന്ന തരത്തില്‍ സംഘപരിവാര്‍ ചിത്രത്തില്‍ ഉയര്‍ത്തിക്കാട്ടിയത് ഇസ്ലാമിക് കൊടിയാണെന്ന് വ്യക്തമായതോടെയാണ് ഈ നുണ പ്രചരണം പൊളിഞ്ഞത്. പാകിസ്താന്‍ കൊടിയുടെ ഇടതുഭാഗത്ത് ദീര്‍ഘചതുരാകൃതിയില്‍ വെളുത്തനിറമുണ്ട്. ഒപ്പം നിറം കടുത്ത നിറത്തിലുളള പച്ചയുമാണ്. ചന്ദ്രക്കലയുടെ ആങ്കിളിലും വ്യത്യാസമുണ്ട്. എന്നാല്‍ ഇസ്ലാമിക് ഫ്‌ളാഗിന് ഇളംപച്ചനിറമാണ്. വെളുത്തഭാഗം ഇല്ലതാനും. ഈ ഫ്ളാഗുള്ള ചിത്രം ഉയര്‍ത്തിക്കാട്ടിയാണ് സംഘപരിവാര്‍ ദളിതരെ പാക് അനുകൂലികളായി താറടിച്ചു കാട്ടിയത്. ഇരുകൊടികളുടെ ചിത്രസഹിതം വ്യത്യാസം വിശദീകരിച്ച് ആള്‍ട്ട് ന്യൂസാണ് സംഘപരിവാറിന്റെ നുണക്കഥ വെളിച്ചത്തു കൊണ്ടുവന്നിരിക്കുന്നത്.
ദേശവിരുദ്ധരാണ് മുംബൈയില്‍ പ്രക്ഷോഭം നടത്തുന്നത് എന്ന് പറഞ്ഞുകൊണ്ടായിരുന്നു ചിത്രം സഹിതം സംഘപരിവാര്‍ അനുകൂല മാധ്യമങ്ങള്‍ പ്രചരണം നടത്തിയത്. അതേസമയം, സംഘപരിവാര്‍ പ്രചരിപ്പിക്കുന്ന ചിത്രം ഭീമ കൊറേഗാവ് സംഭവവുമായി ബന്ധപ്പെട്ടതാണോയെന്ന് സ്ഥിരീകരിക്കാനായിട്ടില്ല. അടുത്തിടെ ദളിത് പ്രക്ഷോഭങ്ങളില്‍ ഐക്യദാര്‍ഢ്യവുമായി മുസ്ലീങ്ങളുടെ സാന്നിധ്യമുണ്ടാവാറുണ്ട്. ദളിത്- മുസ്ലിം ഐക്യദാര്‍ഢ്യത്തിന്റെ ഭാഗമായായിരിക്കാം ഇസ്ലാമിക് ഫ്ളാഗ് പ്രക്ഷോഭത്തില്‍ വന്നതെന്നാണ് കരുതുന്നത്.