സംവരണ വിഷയത്തില്‍ പ്രശ്നപരിഹാരത്തിന് സൗഹാര്‍ദ്ദപരമായ ചര്‍ച്ചകള്‍ ആവശ്യമാണെന്ന് ആര്‍എസ്എസ് അദ്ധ്യക്ഷന്‍ മോഹന്‍ ഭഗവത്. സംവരണത്തെ എതിര്‍ക്കുന്നവരുടെയും അനൂകൂലിക്കുന്നവരുടെയും വികാരങ്ങള്‍ മനസ്സിലാക്കിയാവണം സമവായ ചര്‍ച്ചകള്‍ നടത്തേണ്ടതെന്നും അദ്ദേഹം പറഞ്ഞു.
സംവരണത്തെ എതിര്‍ക്കുന്നവരുടെ താത്പര്യങ്ങള്‍ കൂടി മനസ്സില്‍ വെച്ചുവേണം അനുകൂലിക്കുന്നവര്‍ സംസാരിക്കാന്‍. അതുപോലെ തിരിച്ചും. സംവരണ വിഷയം ഉയര്‍ന്നു വരുമ്പോഴൊക്കെ വിവിധ ഭാഗങ്ങളില്‍ നിന്ന് രൂക്ഷമായ പ്രതികരണങ്ങളാണ് ഉണ്ടാകാറുള്ളത്. സമൂഹത്തിലെ വ്യത്യസ്ത വിഭാഗങ്ങള്‍ തമ്മില്‍ സൗഹാര്‍ദ്ദപരമായ ഒരു അന്തരീക്ഷം സൃഷ്ടിച്ചു കൊണ്ടുവേണം ഈ വിഷയത്തില്‍ ചര്‍ച്ചകള്‍ നടത്തേണ്ടതെന്നും അദ്ദേഹം പറഞ്ഞു.
സംവരണവുമായി ബന്ധപ്പെട്ട വിഷയത്തില്‍ താന്‍ മുമ്പു തന്നെ അഭിപ്രായം വ്യക്തമാക്കിയിരുന്നെന്നും എന്നാല്‍ അതിന്റെമേല്‍ അനാവശ്യ കോലാഹലങ്ങള്‍ സൃഷ്ടിക്കുകയും യഥാര്‍ത്ഥ പ്രശ്നത്തില്‍ നിന്ന് ശ്രദ്ധ തെറ്റിക്കുകയുമാണ് ഉണ്ടായതെന്നും അദ്ദേഹം പറഞ്ഞു.
രാജ്യത്ത് നില നില്‍ക്കുന്ന സംവരണവുമായി ബന്ധപ്പെട്ട വിഷയത്തില്‍ പുനഃപരിശോധന ആവശ്യമാണെന്ന് മോഹന്‍ ഭഗവത് ആവശ്യപ്പെട്ടിരുന്നു. ഇതിനെതിരെ വിവിധ രാഷ്ട്രീയ ജാതി സംഘടനകളില്‍നിന്നും രൂക്ഷമായ വിമര്‍ശനം ഉയര്‍ന്നിരുന്നു.