ചത്തീസ് ഗഡിൽ രണ്ടാം ഘട്ട തെരഞ്ഞെടുപ്പ് നടക്കാനിരിക്കെ ബിജെപിയെ കടത്തിവെട്ടി കോൺഗ്രസിന്റെ വമ്പൻ പ്രഖ്യാപനം. കോണ്ഗ്രസ് വീണ്ടും അധികാരത്തിലെത്തിയാല് പ്രതിവര്ഷം സ്ത്രീകള്ക്ക് 15,000 രൂപ സാമ്പത്തിക സഹായം നല്കുമെന്നാണ് വാഗ്ദാനം.ദീപാവലി ദിനത്തിലാണ് മുഖ്യമന്ത്രി ഭൂപേഷ് ബാഗേല് വൻ പ്രഖ്യാപനം നടത്തിയിട്ടുള്ളത്.
ഛത്തീസ് ഗഡിൽ വീണ്ടും കോൺഗ്രസ് സർക്കാർ രൂപീകരിച്ചതിന് ശേഷം ഗൃഹ ലക്ഷ്മി യോജന പ്രകാരം സംസ്ഥാനത്തെ സ്ത്രീകളുടെ ബാങ്ക് അക്കൗണ്ടുകളിലേക്ക് 15,000 രൂപ വാർഷിക സഹായം നൽകുമെന്ന് ഭൂപേഷ് ബാഗേല് പറഞ്ഞു. ബിജെപി തെരഞ്ഞെടുപ്പ് പ്രകടന പത്രികയില് വിവാഹം കഴിഞ്ഞ സ്ത്രീകള്ക്ക് 12,000 രൂപ സാമ്പത്തിക സഹായം വാഗ്ദാനം ചെയ്തിരുന്നു. ഇതിനെ മറികടന്നാണ് കോൺഗ്രസിൻന്റെ നീക്കം
സംസ്ഥാനത്ത് നവംബര് 17ന് നടക്കുന്ന രണ്ടാം ഘട്ട തെരഞ്ഞെടുപ്പില് 70 മണ്ഡലങ്ങള് ജനവിധിയെഴുതും. ഛത്തീസ്ഗഡിലെ ആദ്യ ഘട്ട തെരഞ്ഞെടുപ്പിൽ 20 മണ്ഡലങ്ങളിലാണ് വോട്ടെടുപ്പ് നടന്നത്. ബിജെപി ഇതില് 14 സീറ്റുകളിലും വിജയിക്കുമെന്നാണ് മുൻ മുഖ്യമന്ത്രി ഡോ. രമൺ സിംഗ് അവകാശപ്പെട്ടിരുന്നു. ഛത്തീസ്ഗഡിലെ ആദ്യ ഘട്ട വോട്ടെടുപ്പ് നവംബര് ഏഴിനാണ് നടന്നത്.