വയനാട്ടിലെ ജനങ്ങള്‍ക്ക് വീണ്ടും നന്ദി പറഞ്ഞ് രാഹുല്‍ ഗാന്ധി. വയനാട്ടുകാര്‍ക്കും കോണ്‍ഗ്രസ് പ്രവര്‍ത്തകര്‍ക്കും അവരുടെ കഠിനാധ്വാനത്തിനും നന്ദി പറഞ്ഞ് മലയാളത്തിലാണ് രാഹുലിന്റെ ട്വീറ്റ്.
“രാജ്യത്തെ ജനങ്ങളുടെ തീരുമാനത്തെ ഞാന്‍ ബഹുമാനിക്കുന്നു. വിജയിച്ച എല്ലാവര്‍ക്കും എന്റെ അഭിനന്ദനങ്ങള്‍. നിങ്ങളുടെ പ്രതിനിധിയായി എന്നെ തിരഞ്ഞെടുത്ത വയനാട്ടിലെ എല്ലാ ജനങ്ങള്‍ക്കും നന്ദി പറയുന്നു. എല്ലാ കോണ്‍ഗ്രസ് പ്രവര്‍ത്തകര്‍ക്കും അവരുടെ കഠിനാധ്വാനത്തിനും പരിശ്രമത്തിനും ഞാന്‍ നന്ദി അറിയിക്കുന്നു” ഇതാണ് രാഹുലിന്റെ ട്വീറ്റ്.
അമേഠി കൈവിട്ടെങ്കിലും വയനാട്ടിലെ വോട്ടര്‍മാര്‍ രാഹുലിന് വമ്പിച്ച വിജയമാണ് നേടിക്കൊടുത്തത്. കേരള ചരിത്രത്തിലെ ഏറ്റവും ഉയര്‍ന്ന ഭൂരിപക്ഷം നേടിയാണ് രാഹുല്‍ ഗാന്ധി വയനാട്ടില്‍ നിന്നും ജയിച്ചത്. 431,770 വോട്ടുകള്‍ക്കാണ് വയനാട്ടില്‍ നിന്നും രാഹുല്‍ ജയിച്ചത്.