വിദ്യാര്‍ത്ഥികളുമായി നടത്തിയ സംവാദത്തില്‍ താന്‍ വിവാഹം കഴിക്കാത്തതിന്റെ കാരണം വ്യക്തമാക്കി രാഹുല്‍ ഗാന്ധി. ജയ്പൂര്‍ മഹാറാണി കോളജിലെ വിദ്യാര്‍ത്ഥികളുമായി നടത്തിയ സംവാദത്തിലായിരുന്നു രാഹുല്‍ കാരണം വ്യക്തമാക്കിയത്. വിദ്യാര്‍ത്ഥികളുമായി നടത്തിയ സംവാദത്തിന്റെ വീഡിയോ രാഹുല്‍ ഗാന്ധി സാമൂഹ്യ മാധ്യമങ്ങളില്‍ പങ്കുവച്ചിട്ടുണ്ട്.
ചോദ്യോത്തര വേളയിലാണ് വിദ്യാര്‍ത്ഥികളിലൊരാള്‍ രാഹുല്‍ ഗാന്ധിയോട് എന്തുകൊണ്ട് വിവാഹം കഴിക്കുന്നില്ല എന്ന് ചോദിച്ചത്. താങ്കള്‍ കഴിവുള്ളവനും വളരെ സുന്ദരനുമാണ്. എന്തുകൊണ്ടാണ് ഇതുവരെ വിവാഹം കഴിക്കാത്തത്? ഇതായിരുന്നു വിദ്യാര്‍ത്ഥിയുടെ ചോദ്യം. കോണ്‍ഗ്രസ് പാര്‍ട്ടിയിലും പാര്‍ട്ടി പ്രവര്‍ത്തനങ്ങളിലുമാണ് ശ്രദ്ധയെന്നായിരുന്നു ചോദ്യത്തിന് രാഹുല്‍ ഗാന്ധി നല്‍കിയ മറുപടി.
സംവാദത്തില്‍ ജാതി സെന്‍സസ്, സ്വാതന്ത്ര്യ സമരത്തില്‍ സ്ത്രീകളുടെ പങ്ക്, സാമ്പത്തിക സ്വാതന്ത്ര്യത്തിന്റെ ആവശ്യകത തുടങ്ങിയ വിവിധ വിഷയങ്ങളില്‍ കുട്ടികള്‍ രാഹുല്‍ ഗാന്ധിയോട് ചോദ്യങ്ങള്‍ ചോദിച്ചു. ഇതിനിടെയാണ് കോണ്‍ഗ്രസ് നേതാവിന്റെ വ്യക്തിജീവിതവുമായി ബന്ധപ്പെട്ട ചോദ്യം വിദ്യാര്‍ത്ഥികള്‍ ഉന്നയിച്ചത്. ഇഷ്ട ഭക്ഷണത്തെ കുറിച്ചും എംപിയോട് കുട്ടികള്‍ ചോദിക്കുകയുണ്ടായി. കയ്പയും കടലയും ചീരയും ഒഴികെ മറ്റൊന്നും കഴിക്കുന്നതില്‍ തനിക്ക് പ്രശ്‌നമില്ലെന്നായിരുന്നു രാഹുലിന്റെ മറുപടി.