മധ്യപ്രദേശില് കോണ്ഗ്രസിന് വന്തിരിച്ചടി. 29 മണ്ഡലങ്ങളില് 28 ഇടത്തും ബിജെപി ലീഡ് ഉയര്ത്തുന്നു. ഒരിടത്ത് മാത്രമാണ് കോണ്ഗ്രസ് മുന്നിട്ടു നില്ക്കുന്നത്.
ഏറ്റവും ശ്രദ്ധേയമായ മണ്ഡലമായ ഭോപ്പാലില് ബിജെപിയുടെ പ്രജ്ഞ സിങ്ങ് താക്കൂര് മുന്നിട്ടു നില്ക്കുന്നു. എതിര് സ്ഥാനാര്ത്ഥിയായ കോണ്ഗ്രസിന്റെ ദിഗ് വിജയ് സിങ്ങിനേക്കാള് 50000ത്തില്പരം വോട്ടുകള്ക്കാണ് പ്രജ്ഞ മുന്നേറുന്നത്. വ്യത്യസ്ത പ്രസ്താവനകളുടെ പേരില് വിവാദത്തില് അകപ്പെട്ട പ്രജ്ഞ സിങ്ങിനെ ജനങ്ങള് കൈവിട്ടില്ല എന്ന് വ്യക്തമാക്കുന്നതാണ് ഇതുവരെ പുറത്തുവന്ന തിരഞ്ഞെടുപ്പ് കണക്കുകള്.
മാലെഗാവ് സ്ഫോടനവുമായി ബന്ധപ്പെട്ട ഒരു കേസില് വിമുക്തയാക്കപ്പെട്ട പ്രജ്ഞ മറ്റൊരു കേസില് ജാമ്യത്തിലാണ്. ഗോഡ്സെ അനുകൂല പരാമര്ശം, ഹേമന്ദ് കര്ക്കറെയുടെ മരണം, ബാബറി മസ്ജിദ് തകര്ക്കല് എന്നീ വിഷയങ്ങളില് പ്രജ്ഞ സിങ്ങ് നടത്തിയ വിവാദ പരാമര്ശങ്ങളുടെ പേരില് തിരഞ്ഞെടുപ്പ് കമ്മീഷന് ഇവരെ 72 മണിക്കൂര് തിരഞ്ഞെടുപ്പ് പ്രചാരണത്തില്നിന്നു വിലക്കിയിരുന്നു.