ഓപ്പറേഷന് സിന്ദൂറില് ഇന്ത്യ നേടിയ ഈ വിജയം രാജ്യത്തെ സ്ത്രീകള്ക്ക് സമര്പ്പിക്കുന്നുവെന്ന് പ്രധാനമന്ത്രി നരേന്ദ്ര മോദി. ഭീകരതയ്ക്ക് അര്ഹിച്ച മറുപടി നല്കാന് രാജ്യത്തിന് സാധിച്ചുവെന്നും അദ്ദേഹം പറഞ്ഞു. ഓപ്പറേഷന് സിന്ദൂറിന് ശേഷം ആദ്യമായി രാജ്യത്തെ അഭിസംബോധന ചെയ്ത് നടത്തിയ പ്രസംഗത്തിലാണ് പ്രധാനമന്ത്രി ഇക്കാര്യം പറഞ്ഞത്. ഓപ്പറേഷന് സിന്ദൂറിലൂടെ നീതി നടപ്പാക്കാന് പ്രതിരോധ സേനയ്ക്ക് സാധിച്ചു. ഭീകരകേന്ദ്രങ്ങള് ഇന്ത്യ ഭസ്മമാക്കി. പാക് ഡ്രോണുകളും മിസൈലുകളും നമ്മള് തകര്ത്തു. ഈ സാഹചര്യത്തില് പാകിസ്ഥാന് ഭയന്നുപോയി. ലോകം മുഴുവന് രക്ഷ തേടുകയായിരുന്നു അവര്.
സേനകള് കാട്ടിയത് അസാമാന്യ ധൈര്യമെന്ന് പറഞ്ഞ മോദി സൈന്യത്തെ ഒന്നടങ്കം പ്രശംസിക്കുകയും ചെയ്തു. പഹല്ഗാമിലേക്ക് സമാനതകളില്ലാത്ത ക്രൂരതയാണെന്ന് പ്രധാനമന്ത്രി കുറ്റപ്പെടുത്തി. അമ്മമാര്ക്കും, ഭാര്യമാര്ക്കും ,കുഞ്ഞുങ്ങള്ക്കും മുന്നിലാണ് ഭീകരരുടെ വെടിയേറ്റ് നിഷ്കളങ്കരായ 26 പേര് പിടഞ്ഞുവീണ് മരിച്ചത്. മതത്തിന്റെ പേരിലാണ് ഭീകരര് ആക്രമണം നടത്തിയത്. പഹല്ഗാം ആക്രമണത്തിന് ശേഷം പാകിസ്ഥാനില് ഭീകരരുടെ പരിശീലന കേന്ദ്രത്തില് കടന്നു കയറി ഇന്ത്യ മറുപടി നല്കിയെന്നും പ്രധാനമന്ത്രി പറഞ്ഞു. ഇങ്ങനെയൊരു ആക്രമണം ഭീകരര് സ്വപ്നത്തില് പോലും പ്രതീക്ഷിച്ചിരുന്നില്ല.
ഓപ്പറേഷന് സിന്ദൂരിലൂടെ നീതി നടപ്പായിരിക്കുന്നു. ബവല്പൂരിലും, മുരിട്കെയിലും ആഗോള തീവ്രവാദ കേന്ദ്രങ്ങളായിരുന്നു പ്രവര്ത്തിച്ചിരുന്നത്. ആ കേന്ദ്രങ്ങള് ഭാരതം ഭസ്മമാക്കി കളഞ്ഞു. ഭീകരതയുടെ യൂണിവേഴ്സിറ്റികളാണ് ഇല്ലാതായത്. നമ്മുടെ പെണ്കുട്ടികളുടെ സിന്ദൂരം ഭീകരര് മായ്ച്ചു. നമ്മള് അവരെ ഭൂമുഖത്ത് നിന്ന് മായ്ച്ച് കളഞ്ഞു. പാകിസ്ഥാന്റെ ഡ്രോണുകളും മിസൈലുകളും ഇന്ത്യ തകര്ത്തിട്ടു. വായുസേന പാകിസ്ഥാന്റെ എയര് ബേസുകള് തകര്ത്തു. ഇതിന് ശേഷം പാകിസ്ഥാന് ഭയപ്പെട്ടു. പാക് ഭീകരവാദത്തെ ഓര്മിപ്പിച്ച് വെളളവും രക്തവും ഒന്നിച്ചൊഴുകില്ലെന്ന് പറഞ്ഞ പ്രധാനമന്ത്രി പാകിസ്ഥാനുമായി ചര്ച്ച നടന്നാല് അത് പാക് അധീന കശ്മീരുമായി ബന്ധപ്പെട്ട് മാത്രമായിരിക്കും എന്നും പറഞ്ഞു.