പതഞ്ജലി കേസിൽ ഐഎംഎ സ്വന്തം ചെലവിൽ പ്രമുഖ പത്രങ്ങളിൽ ക്ഷമാപണം പ്രസിദ്ധീകരിക്കണമെന്ന് സുപ്രീംകോടതി നിർദേശം. ഇന്ത്യൻ മെഡിക്കൽ അസോസിയേഷൻ പ്രസിഡന്റിനോടാണ് സുപ്രീംകോടതി നിർദേശം. ജുഡീഷ്യറിക്കെതിരെ അപകീർത്തികരമായ പരാമർശങ്ങൾ നടത്തിയതിലാണ് കോടതി നിർദേശം.
പതഞ്ജലി കേസിൽ ഐഎംഎ പ്രസിഡന്റ് ഡോ. ആർ വി അശോകൻ സുപ്രീംകോടതിയെ കുറിച്ച് അപകീർത്തികരമായ പരാമർശങ്ങൾ നടത്തിയിരുന്നു. അതുകൊണ്ട് തന്നെ പ്രസിഡന്റ് സ്വന്തം ചെലവിൽ പ്രമുഖ പത്രങ്ങളിൽ ഖേദപ്രകടനം നടത്തണമെന്ന് സുപ്രീംകോടതി പറഞ്ഞു. ഐഎംഎയുടെ പ്രതിനിധി എന്ന നിലയിലല്ല, വ്യക്തിപരമായി അശോകൻ ഈ ക്ഷമാപണം നടത്തണമെന്നും ചെലവ് അദ്ദേഹം തന്നെ വഹിക്കണമെന്നും ജസ്റ്റിസുമാരായ ഹിമ കോഹ്ലിയുടെയും സന്ദീപ് മേത്തയുടെയും ബെഞ്ച് ഉത്തരവിട്ടു.
പതഞ്ജലിയുടെ ആയുർവേദ ഉൽപ്പന്നങ്ങൾ തെറ്റിദ്ധരിപ്പിക്കുന്ന പരസ്യങ്ങൾ നൽകുന്നതുമായി ബന്ധപ്പെട്ട കേസിലായിരുന്നു ഐഎംഎ പ്രസിഡന്റിന്റെ അഭിപ്രായ പ്രകടനം. ആധുനിക വൈദ്യശാസ്ത്രത്തിനെതിരെ പതഞ്ജലി അപവാദ പ്രചരണം നടത്തുന്നതായി ഐഎംഎ ആരോപിച്ചിരുന്നു. ഡോക്ടർമാർക്കുള്ള കോടതിയുടെ നിർദ്ദേശങ്ങളിൽ ഐഎംഎ പ്രസിഡന്റ് പരസ്യമായി വിമർശിച്ചു. തുടർന്നായിരുന്നു കോടതിയുടെ ഇടപെടൽ.