ജമ്മു കശ്മീരിലെ നിയന്ത്രണ രേഖയിൽ (എൽ‌ഒ‌സി) പാകിസ്ഥാൻ സൈന്യം തുടർച്ചയായ അഞ്ചാം രാത്രിയും വെടിനിർത്തൽ കരാർ ലംഘിച്ചു. ഇന്ത്യൻ സൈന്യം ഫലപ്രദവുമായ രീതിയിൽ പ്രതികരിച്ചതായി ഉദ്യോഗസ്ഥർ ഇന്ന് രാവിലെ പറഞ്ഞു. കഴിഞ്ഞയാഴ്ച പഹൽഗാമിൽ നടന്ന ഭീകരാക്രമണത്തെത്തുടർന്ന് ഇന്ത്യയും പാകിസ്ഥാനും തമ്മിലുള്ള സംഘർഷം വർദ്ധിച്ചുവരുന്ന സാഹചര്യത്തിലാണ് വെടിവയ്പ്പ് ഉണ്ടായത്. കുപ്‌വാര, ബരാമുള്ള ജില്ലകൾക്ക് എതിർവശത്തുള്ള പ്രദേശങ്ങളിലും അഖ്നൂർ സെക്ടറിലുമാണ് വെടിവയ്പ്പ് നടന്നത്.
“ഏപ്രിൽ 28-29 രാത്രിയിൽ, കുപ്‌വാര, ബരാമുള്ള ജില്ലകൾക്ക് എതിർവശത്തുള്ള പ്രദേശങ്ങളിലും അഖ്നൂർ സെക്ടറിലും നിയന്ത്രണ രേഖയ്ക്ക് കുറുകെ പാകിസ്ഥാൻ സൈന്യം പ്രകോപനമില്ലാതെ ചെറിയ ആയുധങ്ങൾ ഉപയോഗിച്ച് വെടിവച്ചു. പ്രകോപനത്തിന് ഇന്ത്യൻ സൈന്യം കൃത്യമായും ഫലപ്രദമായും മറുപടി നൽകി.” കരസേന പ്രസ്താവനയിൽ പറഞ്ഞു. വ്യാഴാഴ്ച രാത്രി മുതൽ പാകിസ്ഥാൻ സൈനികർ നിയന്ത്രണരേഖയിലെ വിവിധ ഇന്ത്യൻ പോസ്റ്റുകൾക്ക് നേരെ വെടിയുതിർക്കുകയായിരുന്നു. ഇതുവരെ ആളപായമൊന്നും റിപ്പോർട്ട് ചെയ്തിട്ടില്ല.
ചൊവ്വാഴ്ച ഒരു നേപ്പാളി പൗരൻ ഉൾപ്പെടെ 26 പേരുടെ മരണത്തിന് കാരണമായ പഹൽഗാം ആക്രമണത്തിൽ പാകിസ്ഥാൻ ബന്ധം കണക്കിലെടുത്ത് കർശന നടപടികൾ സ്വീകരിക്കുമെന്ന് ഇന്ത്യ കഴിഞ്ഞ ബുധനാഴ്ച പ്രഖ്യാപിച്ചിരുന്നു. 65 വർഷം പഴക്കമുള്ള സിന്ധു നദീജല കരാർ താൽക്കാലികമായി നിർത്തിവയ്ക്കുക, അട്ടാരി കര അതിർത്തി അടയ്ക്കുക, പാകിസ്ഥാൻ സൈനിക അറ്റാഷുകളെ പുറത്താക്കുക എന്നിവയാണ് നടപടികളിൽ ഉൾപ്പെടുന്നത്. ഇതിന് മറുപടിയായി, ജമ്മു കശ്മീരിലെയും ലഡാക്കിലെയും നിയന്ത്രണ രേഖയെ സാധൂകരിക്കുന്ന 1972 ലെ സിംല കരാർ ഉൾപ്പെടെ ന്യൂഡൽഹിയുമായുള്ള എല്ലാ കരാറുകളും താൽക്കാലികമായി നിർത്തിവയ്ക്കുമെന്ന് പാകിസ്ഥാനും ഭീഷണിപ്പെടുത്തി.