ബുള്‍ഡോസറിന് മുന്നില്‍ മറ്റൊന്നിനും പിടിച്ച് നില്‍ക്കാന്‍ കഴിയില്ലെന്ന് ബോളിവുഡ് നടിയും മഥുര ബിജെപി എംപിയുമായ ഹേമ മാലിനി. നിയമസഭാ തിരഞ്ഞെടുപ്പില്‍ ബിജെപി വിജയം സുനിശ്ചിതമാക്കിയതിന് പിന്നാലെ പ്രതികരിക്കുകയായിരുന്നു അവര്‍.
സര്‍ക്കാര്‍ രൂപീകരിക്കാന്‍ കഴിയുമെന്ന് നേരത്തെ അറിയാമായിരുന്നു. വികസന പ്രവര്‍ത്തനങ്ങളില്‍ ബിജെപി ഏറെ ശ്രദ്ധ ചെലുത്തിയിരുന്നു.അതിനാലാണ് ജനം തങ്ങളെ വിശ്വസിച്ചതെന്നും ഹേമമാലിനി പറഞ്ഞു. സൈക്കിള്‍ ആയാലും, മറ്റെന്തങ്കിലുമായാലും ശരി ബുള്‍ഡോസറിന് മുന്നില്‍ ഒന്നിനും പിടിച്ച് നില്‍ക്കാന്‍ കഴിയില്ല. ബുള്‍ഡോസര്‍ ഒരു മിനിട്ടില്‍ എല്ലാത്തിനെയും തീര്‍ക്കുമെന്നും അവര്‍ കൂട്ടിച്ചേര്‍ത്തു.
ഉത്തര്‍പ്രദേശില്‍ 275 സീറ്റുകളില്‍ ബിജെപി മുന്നിട്ടു നില്‍ക്കുകയാണ്. സമാജ്വാദി പാര്‍ട്ടി 121 സീറ്റുകളില്‍ ലീഡ് ചെയ്യുമ്പോള്‍ കോണ്‍ഗ്രസ് കേവലം രണ്ട് സീറ്റുകളില്‍ മാത്രമാണ് മുന്നിട്ടുനില്‍ക്കുന്നത്.
