നടന് അക്ഷയ് കുമാറുമായുള്ള മോദിയുടെ ഇന്റര്വ്യുവിനെ നിശിതമായി വിമര്ശിച്ച് കോണ്ഗ്രസ്. പ്രധാനമന്ത്രി സംസാരിക്കേണ്ടത് കര്ഷകരോടാണ് അല്ലാതെ സിനിമാ താരങ്ങളോടല്ലെന്ന് പ്രിയങ്ക ഗാന്ധി വിമര്ശിച്ചപ്പോള് ഒരു പടികൂടി കടന്നാണ് പാര്ട്ടി വക്താവ് രംഗത്ത് വന്നത്.
രാഷ്ടീയത്തില് പരാജയപ്പെട്ട മോദി സിനിമാഭിനയത്തിന് തയ്യാറെടുക്കുന്നുവെന്നായിരുന്നു സുര്ജേവാലയുടെ പ്രതികരണം.
പ്രധാനമന്ത്രി നരേന്ദ്രമോദിക്കെതിരെ രൂക്ഷ വിമര്ശനവുമായി എഐസിസി അധ്യക്ഷ പ്രിയങ്ക ഗാന്ധി. നടന് അക്ഷയ് കുമാറുമായുള്ള പ്രധാനമന്ത്രിയുടെ അഭിമുഖത്തില് വിമര്ശനവുമായി രണ്ദീപ് സിങ്ങ് സുര്ജേവാലയും രംഗത്തെത്തി. ഇതൊരു തിരഞ്ഞെടുപ്പ് തട്ടിപ്പാണെന്നായിരുന്നു പശ്ചിമബംഗാള് മുഖ്യമന്ത്രി മമത ബാനര്ജിയുടെ വിമര്ശനം. വോട്ടര്മാരില് ആശയക്കുഴപ്പമുണ്ടാക്കാനുള്ള ബോധപൂര്വമുള്ള ശ്രമമായിട്ടാണ് മമത വിമര്ശിച്ചത്.
കള്ളം പറഞ്ഞ് ജനങ്ങളെ ഏറെക്കാലം പിടിച്ചു നിര്ത്താനാവില്ലെന്ന് അഭിമുഖത്തില് പ്രധാനമന്ത്രി പറഞ്ഞിരുന്നു. പ്രധാനമന്ത്രിയാകുമെന്ന് ഒരിക്കലും കരുതിയിരുന്നില്ല. മറ്റു പലരുമാകുമെന്ന് പ്രതീക്ഷിച്ചിരുന്നു. ചില പശ്ചാത്തലത്തില് വരുന്ന ആളുകള് അത്തരം കാര്യങ്ങള് സ്വപ്നം കണ്ടിരിക്കാം. 1962ലെ യുദ്ധവേളയില് ഗുജറാത്തിലെ മെഹ്സാനയില് നിന്നും പട്ടാളക്കാര് ട്രെയിനില് കയറുന്നത് ഞാന് കാണാറുണ്ടായിരുന്നു. കള്ളം പറഞ്ഞു കൊണ്ട് ഏറെക്കാലം ആളുകളെ പിടിച്ചു നിര്ത്താനാവില്ല. എനിക്കുവേണ്ടി ഞാന് തന്നെ ചില ചിട്ടവട്ടങ്ങള് സൃഷ്ടിച്ചിട്ടുണ്ട്. എളുപ്പം ദുര്വ്യാഖ്യാനം ചെയ്യാമെന്നതിനാല് തമാശ പറയുകയെന്നത് ബുദ്ധിമുട്ടാണ്. സുഹൃത്തുക്കളുമായി തമാശ പറയാറുണ്ട്. പക്ഷേ സോഷ്യല് മീഡിയയില് കുറേക്കൂടി ശ്രദ്ധിച്ചേ ഇടപെടാറുള്ളൂ.
തിരഞ്ഞെടുപ്പ് സമയത്ത് മുടക്കം സംഭവിക്കാറുണ്ടെങ്കിലും മമത ബാനര്ജി എല്ലാ വര്ഷവും തനിക്ക് ഒന്നോ രണ്ടോ കുര്ത്തകള് സമ്മാനമായി നല്കാറുണ്ടെന്നും മോദി അഭിമുഖത്തില് പറഞ്ഞു. ബംഗ്ലാദേശ് പ്രധാനമന്ത്രി ഷെയ്ഖ് ഹസീന എനിക്ക് ബംഗാളി പലഹാരങ്ങള് തന്നു എന്നറിഞ്ഞപ്പോള് മമതയും മധുരപലഹാരങ്ങള് തരാന് തുടങ്ങി. റിട്ടയര്മെന്റ് പ്ലാനുകളെ കുറിച്ച് ആലോചിച്ചിട്ടില്ല. എപ്പോഴും ജോലി ചെയ്യുകയും എന്തെങ്കിലും ഉത്തരവാദിത്വം ഏറ്റെടുക്കുകയും ചെയ്യാറുണ്ട്. എനിക്ക് എന്തെങ്കിലുമൊരു മിഷന് ഉണ്ടാവുമെന്ന് ഉറപ്പാണ്” മോദി പറഞ്ഞു.
സമൂഹ മാധ്യമങ്ങള് തന്നെ വിലയിരുത്തുന്നത് നിരീക്ഷിക്കാറുണ്ടെന്നും ചെലവിനുള്ള പൈസ ഇപ്പോഴും അമ്മയാണ് നല്കാറുള്ളതെന്നും മോദി അഭിമുഖത്തില് വ്യക്തമാക്കിയിരുന്നു. കരി തേപ്പുപെട്ടി വെച്ചാണ് തന്റെ വസ്ത്രങ്ങളൊക്കെ തേച്ചിരുന്നത്. പ്രധാനമന്ത്രി ഒരു സാധാരണ മനുഷ്യനായിരിക്കണമെന്നാണ് ആഗ്രഹിക്കുന്നത്. താന് ദേഷ്യപ്പെടാത്തത് പലരെയും അത്ഭുതപ്പെടുത്താറുണ്ടെന്നും മോദി കൂട്ടിച്ചേര്ത്തു