കര്ണാടകയിലെ കുടകിലുള്ള റിസോര്ട്ടില് മലയാളി കുടുംബത്തെ മരിച്ച നിലയില് കണ്ടെത്തി. കൊല്ലം സ്വദേശികളായ വിനോദ് ബാബു സേനന്(43), ഭാര്യ ജിബി എബ്രഹാം(37), മകള് ജെയ്ന് മരിയ ജേക്കബ്(11) എന്നിവരെയാണ് റിസോര്ട്ടിലെ മുറിക്കുള്ളില് മരിച്ച നിലയില് കണ്ടെത്തിയത്. കഴിഞ്ഞ ദിവസം ഉച്ചയോടെയാണ് റിസോര്ട്ട് ജീവനക്കാര് കുടുംബത്തെ മരിച്ച നിലയില് കണ്ടെത്തിയത്.
വിനോദിനെയും ജിബിയെയും മുറിക്കുള്ളില് തൂങ്ങി മരിച്ച നിലയിലും മകള് ജെയ്നെ കിടക്കയില് മരിച്ച നിലയിലുമായിരുന്നു ജീവനക്കാര് കണ്ടെത്തിയത്. കുട്ടിയെ കൊലപ്പെടുത്തിയ ശേഷം ദമ്പതികള് തൂങ്ങി മരിച്ചതാകാമെന്നാണ് പൊലീസ് അനുമാനം. സാമ്പത്തിക ബാദ്ധ്യതയാകാം കുടുംബം ജീവനൊടുക്കിയതിന് കാരണമെന്നാണ് പൊലീസിന്റെ പ്രാഥമിക നിഗമനം.
മരണത്തില് മറ്റാര്ക്കും പങ്കില്ലെന്ന് ദമ്പതികള് എഴുതി ഒപ്പിട്ട ആത്മഹത്യ കുറിപ്പ് സംഭവ സ്ഥലത്ത് നിന്ന് പൊലീസിന് ലഭിച്ചിട്ടുണ്ട്. മൃതദേഹം കുടകിലെ സര്ക്കാര് ആശുപത്രിയിലേക്ക് മാറ്റി. മരിച്ചവരുടെ ബന്ധുക്കളെ വിവരം അറിയിച്ചിട്ടുണ്ടെന്നും പോസ്റ്റുമോര്ട്ടത്തിന് ശേഷം മൃതദേഹം ബന്ധുക്കള്ക്ക് വിട്ടുനല്കുമെന്നും പൊലീസ് പറഞ്ഞു.