പിതാവിന്റെ മരണത്തില്‍ സംശയമില്ലെന്നും ഇതിന്റെ പേരില്‍ കുടുംബത്തെ പ്രശ്‌നത്തിലാക്കരുതെന്നും സിബിഐ ജഡ്ജി ബ്രിജ് മോഹന്‍ ലോയയുടെ മകന്‍ അനൂജ്. പിതാവിന്റെ മരണത്തില്‍ നേരത്തെ സംശയമുണ്ടായിരുന്നു. എന്നാല്‍ പിന്നീട് അദ്ദേഹത്തിന്റെ മരണം സ്വഭാവികമാണെന്ന് കുടുംബത്തിന് ബോദ്ധ്യമായെന്നും അനൂജ് മാധ്യമങ്ങളോട് പറഞ്ഞു.
കുറച്ചു ദിവസങ്ങളായി മാധ്യമങ്ങള്‍ റിപ്പോര്‍ട്ടു ചെയ്യുന്ന ഇത്തരം കാര്യങ്ങള്‍ മൂലം കുടുംബം വലിയ പ്രശ്‌നങ്ങളാണ് നേരിട്ടുകൊണ്ടിരിക്കുന്നത്. ആര്‍ക്കുമെതിരെ ഒരു പരാതിയും ഞങ്ങള്‍ക്കില്ല. വലിയ വിഷത്തിലാണിപ്പോള്‍ അതില്‍ നിന്നു കരകയറാനുള്ള ശ്രമത്തിലാണ്. ദയവായി ഞങ്ങളെ പീഡിപ്പിക്കരുത്. ആരുടേയും പേര് ഞങ്ങള്‍ വിവാദത്തിലേയ്ക്ക് വലിച്ചിഴയ്ക്കാന്‍ ആഗ്രഹിക്കുന്നില്ല. അദ്ദേഹം പറഞ്ഞു.
ഈയിടെയായി ചില എന്‍ജിഒകളും അഭിഭാഷകരും രാഷ്ട്രീയക്കാരും കുടുംബാംഗങ്ങളെ ശല്യപ്പെടുത്തികൊണ്ടിരിക്കുകയാണ്. ലാത്തൂരില്‍ ഉള്‍പ്രദേശത്താണ് എന്റെ മുത്തഛന്‍ കഴിയുന്നത്. മകന്റെ മരണവുമായി ബന്ധപ്പെട്ട് ചോദ്യങ്ങള്‍ ചോദിച്ച് അദ്ദേഹത്തെയും ശല്യപ്പെടുത്തുകയാണ്. ഇതെല്ലാം കുടുംബത്തെ ആകെ അസ്വസ്ഥരാക്കിയിട്ടുണ്ട്. അനൂജ് പറഞ്ഞു.