പുണ്യമാസമായ റംസാനില്‍ നോമ്പ് തുറക്കുന്നതിനിടെ എയര്‍ ഇന്ത്യ എക്സ്പ്രസില് നടന്ന സംഭവമാണ് ഇപ്പോള്‍ സോഷ്യല്‍ മീഡിയയില്‍ വൈറലാകുന്നത്. നോമ്പ് തുറക്കാന്‍ ഒരു കുപ്പി വെള്ളം ചോദിച്ചയാള്‍ക്ക് വിമാനത്തിലെ എയര്‍ ഹോസ്റ്റസ് നല്‍കിയ മറുപടിയും സ്വീകാര്യതയുമാണ് സോഷ്യല്‍ മീഡിയയില്‍ ചര്‍ച്ചയാകുന്നത്.
ഒരു കുപ്പി വെള്ളം മാത്രം ചോദിച്ച തനിക്ക് വിമാനത്തില്‍ നോമ്പ് തുറക്കാനുള്ള വിഭവങ്ങള്‍ ഉള്‍പ്പെടെ നല്‍കിയതില്‍ സന്തുഷ്ടനായ ഒരു മാധ്യമപ്രവര്‍ത്തകനാണ് ഈ അനുഭവം ട്വിറ്ററിലൂടെ പങ്കുവെച്ചത്. ഗോരഖ്പൂരില്‍ നിന്ന് ഡല്‍ഹിയിലേയ്ക്കുള്ള യാത്രയ്ക്കിടെയാണ് റിഫാത്ത് ജാവെയ്ദ് എന്ന മാധ്യമ പ്രവര്‍ത്തകന്‍ ട്വിറ്ററിലുടെ അനുഭവം പങ്കുവെച്ചിരിക്കുന്നത്.
“നോമ്പ് തുറക്കാനായി കാബിന്‍ ക്രൂവിന്റെ അടുത്ത് ചെന്ന് താന്‍ വെള്ളം ചോദിച്ചു, നോമ്പായതിനാല്‍ ഒരു വെള്ളക്കുപ്പി കൂടി ചോദിച്ചു. എന്നാല്‍ എന്തിനാണ് സീറ്റില്‍ നിന്ന് താങ്കള്‍ എഴുന്നേറ്റ് വന്നതെന്നായിരുന്നു എയര്‍ഹോസ്റ്റസിന്റെ മറുപടി. തിരികെ മടങ്ങി സീറ്റിലെത്തി ഇരിക്കുമ്പോള്‍ വെള്ളം മാത്രം ആവശ്യപ്പെട്ട എനിക്ക് മഞ്ജുള എന്ന എയര്‍ഹോസ്റ്റസ് നല്‍കിയത് സാന്‍ഡ് വിച്ച് ഉള്‍പ്പെടെയുള്ള വിഭവം ആയിരുന്നു. ഇനിയും വേണമെങ്കില്‍ ചോദിക്കാന്‍ മടിക്കേണ്ടന്നും അവര്‍ പുഞ്ചിരിയോടെ പറഞ്ഞാണ് തിരികെ നടന്നത്” – റിഫാത്ത് ജാവെയ്ദ് ട്വിറ്ററില്‍ കുറിച്ചു.
നിറഞ്ഞ കൈയടിയാണ് സംഭവത്തിന് സോഷ്യല്‍ മീഡിയയില്‍ നിന്ന് ലഭിക്കുന്നത്. എയര്‍ ഇന്ത്യ എക്സ്പ്രസില് നിന്ന് ഇങ്ങിനെ ഒരു അനുഭവം ഉണ്ടാകുമെന്ന് ഒരിക്കലും പ്രതീക്ഷിച്ചില്ലെന്നും എന്നാല്‍ ഇത് കേട്ടപ്പോള്‍ സന്തോഷമായെന്നും ചിലര്‍ അഭിപ്രായപ്പെടുന്നു.