ചരിത്ര ദൗത്യത്തിന് തയാറായി ഐഎസ്ആർഒ. ഐഎസ്ആർഒയുടെ നൂറാം ദൗത്യം നാളെ രാവിലെ 6:23 ന് വിക്ഷേപിക്കും. ഇതിനായുള്ള 27 മണിക്കൂർ കൗണ്ട്ഡൗൺ ശ്രീഹരികോട്ടയിൽ ആരംഭിച്ചു. നാളെ രാവിലെ രണ്ടാമത്തെ ലോഞ്ച് പാഡിൽ നിന്നാണ് ജിഎസ്എൽവി റോക്കറ്റിൽ നാവിഗേഷൻ ഉപഗ്രഹം വിക്ഷേപിക്കുന്നത്. ജനുവരി 13ന് ചുമതലയേറ്റ ഐഎസ്ആർഒ ചെയർമാൻ വി നാരായണൻ്റെ ആദ്യ ദൗത്യമാണിത്.
വിക്ഷേപണത്തിനു മുന്നോടിയായി ഇന്നു പുലർച്ചെ 2:53 ന് കൗണ്ട്ഡൗൺ ആരംഭിച്ചതായി ഐഎസ്ആർഒ അറിയിച്ചു. ജിയോസിൻക്രണസ് സാറ്റലൈറ്റ് ലോഞ്ച് വെഹിക്കിൾ (GSLV), അതിൻ്റെ പതിനേഴാമത്തെ വിക്ഷേപണത്തിലൂടെയാണ് നൂറാം ദൗത്യമെന്ന ചരിത്ര നേട്ടം കൈവരിക്കുന്നത്. യുആർ സാറ്റലൈറ്റ് സെൻ്റർ രൂപകല്പന ചെയ്ത് വികസിപ്പിച്ചെടുത്ത എൻവിഎസ്-02 ഉപഗ്രഹത്തിന് ഏകദേശം 2,250 കിലോഗ്രാം ഭാരമുണ്ട്, കൂടാതെ എൽ1, എൽ5, എസ് ബാൻഡുകളിലെ നാവിഗേഷൻ പേലോഡുകളും മുൻപ് വിക്ഷേപിച്ച എൻവിഎസിന് സമാനമായി സി-ബാൻഡിൽ പേലോഡും സജ്ജീകരിച്ചിരിക്കുന്നു.
2023 മേയ് 29 ന് വിക്ഷേപിച്ച രണ്ടാം തലമുറ ഉപഗ്രഹങ്ങളിൽ ആദ്യത്തേതായ NVS-01 ഉപഗ്രഹത്തിന് തുടർച്ചയായിട്ടാണ് GSLV-F12 ദൗത്യം. ഭൗമ, വ്യോമ, സമുദ്ര നാവിഗേഷൻ, കൃത്യമായ കൃഷി, ഫ്ലീറ്റ് മാനേജ്മെൻ്റ്, മൊബൈൽ ഉപകരണങ്ങൾക്കുള്ള ലൊക്കേഷൻ അധിഷ്ഠിത സേവനങ്ങൾ, ഉപഗ്രഹങ്ങൾക്കായുള്ള ഭ്രമണപഥം നിർണ്ണയിക്കൽ, ഐഒടി അധിഷ്ഠിത ആപ്ലിക്കേഷനുകൾ, എമർജൻസി, ടൈമിംഗ് സേവനങ്ങൾ എന്നിവ ഉപഗ്രഹത്തിൻ്റെ പ്രധാന ആപ്ലിക്കേഷനുകളിൽ ഉൾപ്പെടുമെന്ന് ഐഎസ്ആർഒ അറിയിച്ചു.