രാജ്യസഭയിൽ ആം ആദ്മി പാർട്ടി ഡെപ്യൂട്ടി ലീഡർ സ്ഥാനത്തുനിന്ന് നീക്കിയതിനെതിരെ പ്രതികരിച്ച രാഘവ് ഛദ്ദ എംപിക്ക് മറുപടിയുമായി പാർട്ടി നേതാവ് അനുരാഗ് ദണ്ഡ. കുറച്ചു വർഷങ്ങളായി ഛദ്ദ ഭയചകിതനാണെന്നും പ്രധാനമന്ത്രി നരേന്ദ്ര മോദിക്കെതിരെ സംസാരിക്കാൻ മടിക്കുകയാണെന്നും ദണ്ഡ എക്സിൽ കുറിച്ചു.
പാർട്ടിക്കു വേണ്ടി പ്രധാനപ്പെട്ട ദേശീയ വിഷയങ്ങൾ പാർലമെന്റിൽ ഉന്നയിക്കുന്നതിന് പകരം വിമാനത്താവളത്തിലെ ലഘുഭക്ഷണ നിരക്ക് കുറയ്ക്കുന്നത് പോലുള്ള അപ്രധാന കാര്യങ്ങൾക്കാണ് ഛദ്ദ മുൻഗണന നൽകുന്നതെന്ന് പാർട്ടി വക്താവ് കൂടിയായ അനുരാഗ് ദണ്ഡ ആരോപിച്ചു. നരേന്ദ്ര മോദിയെ ഭയക്കുന്നതിനാലാണ് അദ്ദേഹം നിർണായക വിഷയങ്ങളിൽ മൗനം പാലിക്കുന്നതെന്ന കടുത്തവിമർശനവും ദണ്ഡ ഉന്നയിച്ചു.
തന്നെ നിശബ്ദനാക്കാൻ ശ്രമിച്ചാലും തോൽപ്പിക്കാനാവില്ലെന്ന് ഛദ്ദ മറുപടി നൽകിയതോടെ പാർട്ടിയിലെ ആഭ്യന്തര ഭിന്നത രൂക്ഷമായിരിക്കുകയാണ്. കഴിഞ്ഞ ദിവസമാണ് രാജ്യസഭയിലെ ഡെപ്യൂട്ടി ലീഡർ സ്ഥാനത്തുനിന്ന് രാഘവ് ചദ്ദയെ നീക്കണമെന്നാവശ്യപ്പെട്ട് ആംആദ്മി പാർട്ടി രാജ്യസഭാ സെക്രട്ടറിയേറ്റിന് കത്തു നൽകിയത്. ഛദ്ദക്ക് പകരം അശോക് മിത്തലിനെയാണ് പുതിയ ഉപനേതാവായി എഎപി നിയമിച്ചിരിക്കുന്നത്.