ഒരു ഷോയിൽ മോശം പരാമർശം നടത്തിയതിനെ തുടർന്ന് വിവാദം സൃഷ്ടിക്കപെട്ട വിഷയത്തിൽ പോലീസിനോട് കുറ്റസമ്മതം നടത്തി പോഡ്കാസ്റ്റർ രൺവീർ അല്ലാബാദിയ . മഹാരാഷ്ട്ര സൈബറിനു മുമ്പാകെ നൽകിയ പ്രസ്താവനയിൽ വിവാദ പരാമർശങ്ങൾ നടത്തിയതിലൂടെ താൻ ഒരു “തെറ്റ്” ചെയ്തുവെന്ന് പറഞ്ഞതായി ഉദ്യോഗസ്ഥർ പറഞ്ഞു.
കൊമേഡിയൻ സമയ് റെയ്നയുടെ “ഇന്ത്യാസ് ഗോട്ട് ലാറ്റന്റ്” എന്ന യൂട്യൂബ് ഷോയിൽ അല്ലാബാദിയ നടത്തിയ വിവാദ പരാമർശങ്ങൾ മഹാരാഷ്ട്ര സൈബറും മുംബൈ പോലീസും അന്വേഷിക്കുകയാണ്. മാതാപിതാക്കളെയും ലൈംഗികതയെയും കുറിച്ച് അല്ലാബാദിയ മോശം പരാമർശങ്ങൾ നടത്തിയിരുന്നു. ഇത് വ്യാപകമായ പ്രതിഷേധത്തിനും നിരവധി എഫ്ഐആറുകൾക്കും കാരണമായി.
അശ്ലീലത ആരോപിച്ച് മഹാരാഷ്ട്ര സൈബർ രജിസ്റ്റർ ചെയ്ത കേസിൽ തിങ്കളാഴ്ച അല്ലാബാദിയയും യൂട്യൂബർ കൂടിയായ ആശിഷ് ചഞ്ച്ലാനിയും വെവ്വേറെ മൊഴി രേഖപ്പെടുത്താൻ മഹാരാഷ്ട്ര സൈബറിനു മുന്നിൽ ഹാജരായി.