കൈവിലങ്ങ് ധരിച്ച പ്രതിയുമായി ഗംഗാനദിയില്‍ പുണ്യസ്‌നാനം നടത്തിയതിന് മധ്യപ്രദേശിലെ ബുര്‍ഹാന്‍പൂര്‍ ലാല്‍ഭാഗ് സ്റ്റേഷനിലെ പൊലീസുകാര്‍ക്ക് കാരണം കാണിക്കല്‍ നോട്ടീസ്. സംഭവത്തിന്റെ ദൃശ്യങ്ങള്‍ സാമൂഹിക മാധ്യമങ്ങളില്‍ വൈറലായതോടെയാണ് നടപടി.
ഉത്തര്‍പ്രദേശില്‍ നിന്നും പിടികൂടിയ പ്രതിയുമായി തിരികെ മടങ്ങുമ്പോഴാണ് സംഭവം. ഫെബ്രുവരി 16നാണ് പ്രതിയെ പിടികൂടാനായി മധ്യപ്രദേശ് പൊലീസ് യുപിയില്‍ എത്തിയത്. പ്രതിയെ പിടികൂടിയ ശേഷം പൊലീസുകാര്‍ ഗംഗയില്‍ പോയി മുങ്ങുകയായിരുന്നു.
ഗംഗയില്‍ മുങ്ങിയാല്‍ പാപങ്ങള്‍ ഇല്ലാതാകുമെന്നും ദിവസം ശുഭകരമാകുമെന്നും കരുതിയാണ് ഗംഗയില്‍ ഇറങ്ങിയതെന്നാണ് പൊലീസിന്റെ വാദം. പ്രതിയെ മറ്റെവിടെയും നിര്‍ത്താന്‍ കഴിയാത്തതിനാലാണ് കൂടെ കൂട്ടിയതെന്നും പൊലീസ് പറഞ്ഞു.
സംഭവത്തില്‍ അന്വേഷണ സംഘത്തിന് നേതൃത്വം നല്‍കിയ സബ് ഇന്‍സ്പെക്ടര്‍ കേശവ് പാട്ടീലിന് നോട്ടീസ് നല്‍കിയെന്ന് പൊലീസ് വൃത്തങ്ങള്‍ പറയുന്നു.
