നിയമസഭാ തിരഞ്ഞെടുപ്പ് വോട്ടെണ്ണൽ പുരോഗമിക്കവേ ഡൽഹി മുഖ്യമന്ത്രി അതിഷി പിന്നിൽ. കൽക്കാജി മണ്ഡലത്തിൽ ബിജെപിയുടെ മുതിർന്ന നേതാവ് രമേശ് ബിധുരിയാണ് ലീഡ് ചെയ്യുന്നത്. 1039 വോട്ടുകൾക്കാന് രമേശ് ബിധുരി ലീഡ് ചെയ്യുന്നത്. കോൺഗ്രസിന്റെ മുതിർന്ന നേതാവ് അൽക്ക ലാംബയും അതിഷിക്ക് തൊട്ടുപിന്നിലുണ്ട്. ഇഞ്ചോടിഞ്ച് പോരാട്ടമാണ് കൽക്കാജി മണ്ഡലത്തിൽ നടക്കുന്നത്.
അതേസമയം ആം ആദ്മി പാർട്ടി ദേശീയ കൺവീനറും മുൻ മുഖ്യമന്ത്രിയുമായ അരവിന്ദ് കെജ്‌രിവാൾ ന്യൂ ഡൽഹി മണ്ഡലത്തിൽ ലീഡ് തിരിച്ചു പിടിച്ചിട്ടുണ്ട്. ബിജെപിയുടെ പർവേഷ് സാഹിബ് സിംഗിനേക്കാൾ 386 വോട്ടുകൾക്ക് മുന്നിലാണ് കെജ്‌രിവാൾ. എഎപി നേതാവ് മനീഷ് സിസോദിയയും ജംഗ്പുര സീറ്റിൽ ലീഡ് ചെയ്യുന്നു. 2686 വോട്ടുകൾക്കാണ് സിസോദിയ ലീഡ് ചെയ്യുന്നത്. വോട്ടെണ്ണലിന്റെ തുടക്കത്തിൽ കെജ്‌രിവാളും സിസോദിയയും പിന്നിലായിരുന്നു.
27 വർഷങ്ങൾക്ക് ശേഷം ഡൽഹി ബിജെപിയുടെ കൈകളിലേക്ക്. ഡൽഹി നിയമസഭാ തിരഞ്ഞെടുപ്പിലെ വോട്ടെണ്ണൽ പുരോഗമിക്കുമ്പോൾ ബിജെപി വിജയത്തിലേക്ക് കുതിക്കുകയാണ്. തുടർച്ചയായി വീണ്ടും അധികാരത്തിലേറാൻ മോഹിച്ച എഎപിക്ക് കാലിടറുകയാണ്. ബിജെപി ലീഡ് ഉയര്‍ത്തുകയാണ്.