ഡൽഹിയിൽ ഹുമയൂൺ റോഡിലെയും അക്ബർ റോഡിലെയും സൂചന ബോർഡുകൾ നശിപ്പിച്ച നിലയിൽ. മുഗൾ ചക്രവർത്തിമാരുടെ പേരിലുള്ള പാതകളിലെ സൈൻ ബോർഡുകൾ വെള്ളിയാഴ്ച രാത്രിയാണ് നശിപ്പിച്ചതായി കണ്ടെത്തിയത്. പകരം ബോർഡിൽ ഛത്രപതി ശിവജിയുടെ ചിത്രങ്ങളും ഒട്ടിച്ചിട്ടുണ്ട്. ഒരു കൂട്ടം യുവാക്കളാണ് അക്രമണത്തിന് പിന്നിലെന്നാണ് റിപ്പോർട്ട്.
സൈൻ ബോർഡിൽ കരി തേച്ച യുവാക്കൾ ബോർഡിൽ ശിവജിയുടെ ചിത്രങ്ങൾ പതിക്കുകയായിരുന്നു. ഛത്രപതി ശിവജി മാർഗ് എന്ന് എഴുതിയ പോസ്റ്ററുകൾ ഒട്ടിക്കുകയും അതിൽ പാലൊഴിക്കുകയും ചെയ്തിട്ടുണ്ട്. അക്ബർ റോഡ് എന്നെഴുതിയ ബോർഡിൽ അക്രമി സംഘം മൂത്രമൊഴിച്ചതായും ബാബർ റോഡ് എന്ന സൈൻ ബോർഡിൽ കരി തേച്ചതായും ദേശീയ മാധ്യമങ്ങൾ റിപ്പോർട്ട് ചെയ്തു.
ദക്ഷ് ചൗധരിയെന്ന യുവാവിൻ്റെ നേതൃത്വത്തിലുള്ള സംഘമാണ് ദുഷ്പ്രവർത്തികൾ ചെയ്തതെന്നാണ് റിപ്പോർട്ടുകൾ. വിക്കി കൗശൽ അഭിനയിച്ച ‘ഛാവ’ കണ്ടുമടങ്ങിയ യുവാക്കളാണ് അക്രമി സംഘത്തിലുണ്ടായിരുന്നത്. അക്ബറിന്റെയും ബാബറിൻ്റെയും പേരുകൾ പതിച്ച ബോർഡുകൾ മാറ്റിയില്ലെങ്കിൽ തങ്ങൾ പിഴുതുമാറ്റുമെന്ന് സംഘം ഭീഷണിപ്പെടുത്തുന്നതും മൂത്രമൊഴിക്കുന്നതുമെല്ലാം സമൂഹമാധ്യമങ്ങളിൽ പ്രചരിക്കുന്ന വീഡിയോയിൽ കാണാം.
ഇന്ന് മുതൽ അക്ബർ റോഡിൻ്റെ പേര് ഛത്രപതി ശിവജി മാർഗെന്നാണെന്നും ദേശീയവാദി സർക്കാരാണെങ്കിൽ റോഡിന്റെ പേരെത്രയും പെട്ടെന്ന് മാറ്റണമെന്നും തങ്ങൾ രാജ്യദ്രോഹികളല്ലെന്നും എല്ലാവരും ‘ഛാവ’ സിനിമയിൽ ശിവജി മഹാരാജിന്റെ ചരിത്രം കണ്ടവരാണെന്നും വളരെ ക്രൂരമായാണ് കൊല്ലപ്പെട്ടതെന്നും സംഘത്തിലുള്ള യുവാക്കൾ പറയുന്നു.
അതേസമയം വിക്കി കൗശൽ നായകനായ ‘ഛാവ’ എന്ന ചിത്രത്തെ പ്രധാനമന്ത്രി നരേന്ദ്ര മോദി പ്രശംസിച്ചു. ഛത്രപതി ശിവാജി മഹാരാജിന്റെ മകൻ ഛത്രപതി സംബാജിയുടെ ജീവിതത്തെ ആസ്പദമാക്കിയുള്ള ആനുകാലിക ചിത്രമാണിത്.