ബിഹാറിൽ കോവിഡ് ബാധിച്ച് മരിച്ചയാളുടെ മൃതദേഹം മാലിന്യ വണ്ടിയിൽ കൊണ്ട് പോകുന്നതിന്റെ ദൃശ്യങ്ങൾ പുറത്തുവന്നു. ഞായറാഴ്ച ബിഹാറിലെ നളന്ദയിലെ ആശുപത്രിയിൽ നിന്ന് മൃതദേഹം മുനിസിപ്പൽ കോർപ്പറേഷന്റെ മാലിന്യം ശേഖരിക്കുന്ന ഉന്തുവണ്ടിയിൽ ശ്മശാനത്തിലേക്ക് കൊണ്ടുപോയി.
സംഭവം വാർത്തയായതോടെ അന്വേഷണം നടത്തുമെന്ന് ആശുപത്രി അധികൃതർ വ്യക്തമാക്കി. ആശുപത്രിക്ക് ഇരുന്നൂറിലധികം വണ്ടികളുണ്ട്. എന്നിട്ടും എന്തിനാണ് മാലിന്യം ശേഖരിക്കുന്ന വണ്ടിയിൽ കൊണ്ടുപോയതെന്ന് പരിശോധിച്ച് നടപടിയെടുക്കുമെന്ന് ആശുപത്രിയിലെ സിവിൽ സർജൻ ഡോ. സുനിൽ കുമാർ പറഞ്ഞു. ബിഹാർ മുഖ്യമന്ത്രി നിതീഷ് കുമാറിന്റെ സ്വദേശമാണ് നളന്ദ. രാജ്യത്തിന്റെ മറ്റു ഭാഗങ്ങളിലും ഇത്തരം സംഭവങ്ങൾ റിപ്പോർട്ട് ചെയ്യപ്പെട്ടിട്ടുണ്ട്.