ഇറാന് ഉപാധിയില്ലാതെ കീഴടങ്ങണമെന്നും ഇറാനിലെ നേതാക്കളെ വധിക്കുമെന്നുമുള്ള ട്രംപിന്റെ തുറന്ന ഭീഷണി അങ്ങേയറ്റം അപലപനീയമാണെന്ന് സിപിഎം പോളിറ്റ് ബ്യൂറോ. ഇസ്രയേലിനൊപ്പം ചേര്ന്ന് ഇറാനെ ആക്രമിക്കാന് അമേരിക്ക ഒരുക്കമാണെന്നതിന് തെളിവാണ് പശ്ചിമേഷ്യയിലേക്ക് കൂടുതലായി എത്തുന്ന യുഎസ് പടക്കപ്പലുകള്. ഇത്തരം നീക്കങ്ങള് അപകടകരവും മേഖലയെയും ലോകത്തെയും വിനാശകരമായ യുദ്ധത്തിലേക്ക് തള്ളിവിടാന് സാധ്യതയുള്ളതുമാണ്.
കാനഡയില് നടന്ന ജി7 ഉച്ചകോടി പ്രസ്താവനയും യുദ്ധത്തിന് ആക്കം പകരുന്നതാണ്. ഇസ്രയേലിന്റെ കയ്യേറ്റം കണ്ടില്ലെന്ന് നടിക്കുകയും ഇറാനെ കുറ്റപ്പെടുത്തുകയും ചെയ്യുന്ന ജി7 നിലപാട് നിന്ദ്യമാണ്. പശ്ചിമേഷ്യയിലെ അസ്ഥിരതയ്ക്കും വര്ധിക്കുന്ന സംഘര്ഷത്തിനും മുഖ്യഉത്തരവാദിത്തം ഇസ്രയേലിനാണ്.
ഗാസയ്ക്കുനേരെ വംശഹത്യ ലക്ഷ്യമിട്ടുള്ള ആക്രമണം നടത്തുന്ന ഇസ്രയേല് ഇപ്പോള് സിറിയ, ലെബനന്, യമന്, ഇറാന് തുടങ്ങി മേഖലയിലെ മറ്റ് രാജ്യങ്ങള്ക്ക് നേരെയും സൈനിക നടപടി ബോധപൂര്വം വ്യാപിപ്പിക്കുകയാണ്. ഇസ്രയേലിനെ നിയന്ത്രിക്കാതെ മേഖലയില് സമാധാനവും സ്ഥിരതയും സാധ്യമാവില്ല.
അന്താരാഷ്ട്ര ചട്ടങ്ങളും നിയമങ്ങളുമെല്ലാം ലംഘിച്ച് പശ്ചിമേഷ്യയിലും അതിനപ്പുറവും തങ്ങളുടെ ആധിപത്യം സ്ഥാപിക്കുന്നതിനായി യുഎസും പാശ്ചാത്യ സാമ്രാജ്യത്വവും തെമ്മാടി രാഷ്ട്രമായ ഇസ്രയേലിനെ ഉപയോഗപ്പെടുത്തുകയാണ്. കടന്നുകയറ്റം അവസാനിപ്പിച്ച് നയതന്ത്രത്തിലേക്ക് മടങ്ങാന് അന്താരാഷ്ട്ര സമൂഹം യുഎസിനും ഇസ്രയേലിനുംമേല് സമര്ദം ചെലുത്തണം.
യുഎസ് – ഇസ്രയേല് അനുകൂല വിദേശനയം തിരുത്താന് ബിജെപി നേതൃത്വത്തിലുള്ള കേന്ദ്രസര്ക്കാര് തയ്യാറാകണമെന്നും സിപിഎം ആവശ്യപ്പെട്ടു.