മണിപ്പൂര് കലാപം അവസാനിപ്പിക്കാന് കേന്ദ്രസര്ക്കാര് ശക്തമായ ഇടപെടല് നടത്തണമെന്ന് സിപിഐം പൊളിറ്റ് ബ്യൂറോ. സമാധാനം ഉടന് പുനഃസ്ഥാപിക്കണമെന്നും ചര്ച്ചകളിലൂടെ രാഷ്ട്രീയപരിഹാരം കാണണമെന്നും പിബി പുറത്തിറക്കിയ പ്രസ്താവനയില് ആവശ്യപ്പെട്ടു.
മണിപ്പൂരില് സ്ഥിതിഗതികള് വഷളാക്കിയത് മുഖ്യമന്ത്രി ബീരേന് സിംഗ് ആണ്. എന്നിട്ടും കേന്ദ്രസര്ക്കാരും ബിജെപിയും ബീരേന് സിംഗിനെ അധികാരത്തില് തുടരാന് അനുവദിക്കുന്നു. നവംബര് ഏഴിന് ശേഷം മണിപ്പൂരില് 20 പേര് കൊല്ലപ്പെട്ടു. മണിപ്പൂരില് ഗുരുതരമായ സാഹചര്യമാണ് ഉണ്ടായിരിക്കുന്നതെന്നും സിപിഎം പ്രസ്താവനയില് പറഞ്ഞു.
മണിപ്പൂരില് വീണ്ടും സംഘര്ഷങ്ങള് രൂക്ഷമായതോടെ ബിജെപി നയിക്കുന്ന സര്ക്കാരിനുള്ള പിന്തുണ എന്പിപി പിന്വലിച്ചിരുന്നു . മണിപ്പൂരില് ക്രമസമാധാനപാലനം നടപ്പിലാക്കുന്നതില് സര്ക്കാര് പരാജയപ്പെട്ടെന്ന് ആരോപിച്ചാണ് എന്പിപി പിന്തുണ പിന്വലിച്ചത്. സംഘര്ഷം നിയന്ത്രിക്കുന്നതില് സര്ക്കാര് പരാജയപ്പെട്ടെന്ന് ബിജെപി അധ്യക്ഷന് ജെപി നദ്ദയ്ക്ക് അയച്ച കത്തില് എന്പിപി വ്യക്തമാക്കുന്നു.
സംസ്ഥാനത്തെ നിലവിലെ ക്രമസമാധാന നിലയെ കുറിച്ചും ജെപി നദ്ദയ്ക്ക് അയച്ച കത്തില് കോണ്റാഡ് സാങ്മയുടെ നാഷണല് പീപ്പിള്സ് പാര്ട്ടി ആശങ്ക പ്രകടമാക്കി. സംഘര്ഷത്തെ തുടര്ന്ന് പ്രതിപക്ഷം ബിജെപിയ്ക്ക് എതിരെ പ്രതിഷേധം കടുപ്പിക്കുന്നതിനിടയിലാണ് എന്പിപി നിലപാട് വ്യക്തമാക്കിയിരിക്കുന്നത്.
എന്നാല് എന്പിപിയുടെ പിന്തുണ പിന്വലിക്കല് ബിജെപി സര്ക്കാരിന്റെ നിലനില്പ്പിനെ ബാധിക്കില്ലെന്നാണ് വിലയിരുത്തല്. മണിപ്പൂരിലെ 60 അംഗ നിയമസഭയില് ബിജെപിയ്ക്ക് 37 സീറ്റുകളുണ്ട്. 7 സീറ്റുകളാണ് എന്പിപിയ്ക്ക്. 31 സീറ്റുകളാണ് ഭൂരിപക്ഷത്തിന് വേണ്ടത്. ജനതാദള് യുണൈറ്റഡിന് 5 സീറ്റും, നാഗാ പീപ്പിള്സ് ഫ്രണ്ടിന് 5 സീറ്റും കൂടാതെ മൂന്ന് സ്വതന്ത്ര എംഎല്എമാരുടെയും പിന്തുണ ബിജെപിയ്ക്കുണ്ട്.