കോൺഗ്രസ് അദ്ധ്യക്ഷനെ ജൂണിൽ തിരഞ്ഞെടുക്കുമെന്ന് എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ. കോൺഗ്രസ് പ്രവർത്തക സമിതിക്ക് ശേഷം നടത്തിയ വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം. അദ്ധ്യക്ഷനെ തിരഞ്ഞെടുപ്പിലൂടെയാവും നിശ്ചയിക്കുകയെന്നും പ്രവർത്തക സമിതി യോഗത്തിന് ശേഷം അദ്ദേഹം മാധ്യമങ്ങളോട് പറഞ്ഞു.
സംഘടനാ തിരഞ്ഞെടുപ്പ് മേയിൽ നടക്കും. വരുന്ന അഞ്ച് സംസ്ഥാനങ്ങളിലെ നിയമസഭാ തിരഞ്ഞെടുപ്പുകളെ ബാധിക്കാത്ത വിധമാകും സംഘടന തിരഞ്ഞെടുപ്പ്. ഒറ്റക്കെട്ടായി എടുത്ത തീരുമാനമാണിതെന്നും അദ്ദേഹം പറഞ്ഞു.
കോൺഗ്രസിലെ എതിർശബ്ദം പാർട്ടിയെ ദുർബലപ്പെടുത്തുന്നുവെന്ന് ഒരുവിഭാഗം നേതാക്കൾ പ്രവർത്തക സമിതിയിൽ അഭിപ്രായപ്പെട്ടു. ശൈലി മാറണമെന്ന് തിരുത്തൽവാദികളായ നേതാക്കൾ ആവശ്യപ്പെട്ടെന്നാണ് സൂചന. രാഹുൽ ഗാന്ധി അദ്ധ്യക്ഷ സ്ഥാനത്തേക്ക് തിരികെ വരണമെന്ന് പ്രവർത്തക സമിതി ഇന്ന് വീണ്ടും ആവശ്യപ്പെട്ടിരുന്നു.
കർഷക സമരത്തിന് പിന്തുണ തുടരാൻ എ.ഐ.സി.സി തീരുമാനിച്ചു. തുടർച്ചയായ സമരങ്ങൾ സംഘടിപ്പിക്കും. സമരം കണക്കിലെടുത്ത് സർക്കാർ കാർഷിക നിയമങ്ങൾ പിൻവലിക്കണമെന്ന് യോഗം ആവശ്യപ്പെട്ടു. രാജ്യസുരക്ഷ സംബന്ധിച്ച വിവരങ്ങൾ അർണബ് ഗോസാമിക്ക് ലഭിച്ചത് ജെ.പി.സി അന്വേഷിക്കണം.
കോവിഡ് വാക്സിനേഷനോട് കോൺഗ്രസ് സഹകരിക്കും. വാക്സിൻ നിർമിച്ച ശാസ്ത്രജ്ഞരെ യോഗം അഭിനന്ദിച്ചു. അതേസമയം, പാർട്ടിയിൽ തിരുത്തൽവാദമുയർത്തിയ നേതാക്കൾക്കെതിരെ യോഗത്തിൽ വിമർശനം ഉയർന്നു. എന്നാൽ, പ്രവർത്തന ശൈലി മാറണമെന്നും നിയമസഭ തിരഞ്ഞെടുപ്പിന് മുമ്പ് അദ്ധ്യക്ഷനെ നിശ്ചയിക്കണമെന്നും തിരുത്തൽവാദമുയർത്തിയ നേതാക്കൾ ആവശ്യപ്പെട്ടു.