2024 ലോക്സഭാ തെരഞ്ഞെടുപ്പിനുള്ള തയ്യാറെടുപ്പുകളുമായി മുന്നോട്ടു പോകുകയാണ് കോൺഗ്രസ്. ഇതിന്റെ ഭാഗമായി മാനിഫെസ്റ്റോ കമ്മിറ്റിയെ രൂപീകരിച്ചു. കമ്മിറ്റി ചെയർമാനായി പി ചിദംബരത്തെയും കൺവീനറായി ടി.എസ് സിംഗ് ദേവിനെയും നിയമിച്ചു. പ്രിയങ്ക ഗാന്ധി, ശശി തരൂർ, സിദ്ധരാമയ്യ, ജയറാം രമേഷ് എന്നിവരടങ്ങുന്ന 16 അംഗ സമിതിയാണ് രൂപീകരിച്ചത്.
ഇതിനു പുറമേ സ്ഥാനാർത്ഥി നിർണയ ചർച്ചകളിലേക്കും കോൺഗ്രസ് ഉടൻ കടക്കുമെന്നാണ് റിപ്പോർട്ടുകൾ. അതിനിടെ പ്രധാനമന്ത്രി മുഖത്തെ ചൊല്ലി ഇന്ത്യ സഖ്യത്തിൽ രൂപപ്പെട്ട ഭിന്നത പരിഹരിക്കാനും കോൺഗ്രസ് നീക്കം തുടങ്ങിയിട്ടുണ്ട്. കോൺഗ്രസ് അധ്യക്ഷൻ മല്ലികാർജുൻ ഖാർഗെ ഇന്ത്യ സഖ്യ നേതാക്കളുമായി ഉടൻ ചർച്ച നടത്തും. കഴിഞ്ഞ ദിവസം രാഹുൽ ഗാന്ധി നിതീഷ് കുമാറുമായി ഫോണിൽ സംസാരിച്ചിരുന്നു.