സംസ്ഥാനത്തെ വിവിധ വകുപ്പുകളിലെ എല്ഡിസി തസ്തികകളില് ആശ്രിത നിയമനം ലഭിച്ചവരുടെ കണക്കെടുക്കാനുള്ള ഹൈക്കോടതി ഉത്തരവിനെതിരെ ആശ്രത നിയമനം നേടിയവരുടെ ഹര്ജിയില് നോട്ടീസയച്ച് സുപ്രീം കോടതി. ഹൈക്കോടതി ഉത്തരവിനെ തുടര്ന്നുള്ള നടപടികളില് മുന്നോട്ട് പോകാതെ തല്സ്ഥിതി തുടരാനാണ് സുപ്രീം കോടതി ഉത്തരവിട്ടിരിക്കുന്നത്. ജസ്റ്റിസുമാരായ ദിപാങ്കര് ദത്ത, കെ വിനോദ് ചന്ദ്രന് എന്നിവരടങ്ങിയ ബെഞ്ചാണ് ആശ്രിതനിയമനം ലഭിച്ചവരുടെ ഹര്ജിയില് ഉത്തരവിട്ടത്.
ഹൈക്കോടതിയുടെ ഉത്തരവ് ചോദ്യം ചെയ്ത് ആശ്രിതനിയമനം ലഭിച്ചവരാണ് സുപ്രീം കോടതിയെ സമീപിച്ചത്. ആശ്രിത നിയമനം ലഭിച്ചവരുടെ വാദം കേള്ക്കാതെയാണ് ഹൈക്കോടതി വിധി പ്രസ്താവിച്ചതെന്ന് ഹര്ജിക്കാര്ക്ക് വേണ്ടി ഹാജരായ സീനിയര് അഭിഭാഷകന് വി. ചിദംബരേഷ് വാദിച്ചു. പിഎസ്സി റാങ്ക് ലിസ്റ്റില് ഉള്പ്പെട്ടവരുടെ ഹര്ജികള് പരിഗണിച്ചായിരുന്നു ഹൈക്കോടതിയുടെ കണക്കെടുപ്പിനുള്ള ഉത്തരവ്.
ഓരോ വകുപ്പിലും അഞ്ചു ശതമാനം വീതം ഒഴിവാണ് ആശ്രിതനിയമനത്തിനായി സംവരണം ചെയ്തിട്ടുള്ളത്. ഈ പരിധിക്കപ്പുറമായി നിയമനം ലഭിച്ചിട്ടുള്ളവരെ താത്കാലിക തസ്തിക രൂപീകരിച്ച് അതിലേക്ക് മാറ്റാനായിരുന്നു കേരള ഹൈക്കോടതി ഉത്തരവ്. ഭാവിയില് ഒഴിവുണ്ടാകുന്ന മുറയ്ക്ക് താത്കാലിക തസ്തികയില് നിയമനം ലഭിച്ചവരെ സ്ഥിരപ്പെടുത്താനും ഹൈക്കോടതി ഉത്തരവിട്ടിരുന്നു. ഇതിന്റെ ഭാഗമായിട്ടാണ് അഞ്ച് ശതമാനത്തിലധികം നിയമനം ലഭിച്ചിട്ടുണ്ടോയെന്ന് അറിയുന്നതിന് കണക്കെടുപ്പ് നടത്താന് ഹൈക്കോടതി ഉത്തരവിട്ടിരുന്നത്.
എന്നാല് ഇതിനെതിരെയാണ് ആശ്രിത നിയമനം ലഭിച്ചവര് തങ്ങളുടെ വാദം കേള്ക്കാതെയാണ് നടപടിയെന്ന് ചൂണ്ടിക്കാണിച്ച് സുപ്രീം കോടതിയെ സമീപിച്ചത്. സ്ഥിരം നിയമനം ലഭിച്ചവരെ താത്കാലിക തസ്തികയിലേക്ക് മാറ്റുമ്പോള് അവരുടെ സീനിയോറിറ്റി നഷ്ടപ്പെടുമെന്നും ഹര്ജിക്കാര് ചൂണ്ടിക്കാട്ടി. തുടര്ന്നാണ് കേസില് തല്സ്ഥിതി തുടരാനും സംസ്ഥാന സര്ക്കാരുള്പ്പടെയുള്ള എതിര്കക്ഷികള്ക്ക് നോട്ടീസയക്കാനും സുപ്രീം കോടതി ഉത്തരവിട്ടത്.
ഹൈക്കോടതി ഉത്തരവിനെതിരെ റവന്യു, ആരോഗ്യ, വിദ്യാഭ്യാസ വകുപ്പുകളിലെ എല്ഡിസി തസ്തികളില് ആശ്രിത നിയമനം ലഭിച്ചവരാണ് സുപ്രീം കോടതിയെ സമീപിച്ചത്. ഹര്ജിക്കാര്ക്ക് വേണ്ടി സീനിയര് അഭിഭാഷകന് വി. ചിദംബരേഷ്, അഭിഭാഷകരായ ധീരജ് എബ്രഹാം, ഗോവിന്ദ് വേണുഗോപാല് എന്നിവര് സുപ്രീം കോടതിയില് ഹാജരായി.