ഗണിതശാസ്ത്ര അധ്യാപിക കരണത്തടിച്ചതിനെ തുടര്‍ന്ന് മൂന്നാം ക്ലാസ് വിദ്യാര്‍ത്ഥിയുടെ കേള്‍വി ശക്തി നഷ്ടമായി. ഡല്‍ഹിയിലാണ് സംഭവം. ഡല്‍ഹി ഭായി പര്‍മാനന്ദ് വിദ്യാമന്ദിര്‍ സ്‌കൂളിലെ അധ്യാപികയാണ് വിദ്യാര്‍ത്ഥിയുടെ കരണത്തടിച്ചത്.
ശക്തമായ അടിയേറ്റതിനെ തുടര്‍ന്ന് വിദ്യാര്‍ത്ഥി ചികിത്സയിലാണ്. വിദ്യാര്‍ത്ഥിയുടെ മാതാപിതാക്കള്‍ സ്‌കൂളിനെതിരെ രംഗത്തുവന്നു. മുമ്പും ഇത്തരം സംഭവം സ്‌കൂളില്‍ ഉണ്ടായിട്ടുണ്ടെന്ന് മാതാപിതാക്കള്‍ ആരോപിക്കുന്നു.
മുമ്പ് മറ്റൊരു അധ്യാപിക അടിച്ചതിനെ തുടര്‍ന്ന് കുട്ടിയുടെ കൈമുട്ടിന്റെ ചിരട്ട തെന്നിപ്പോയിരുന്നു.അന്ന് പൊലീസില്‍ കേസ് നല്‍കിയിരുന്നു. അതിനുശേഷം തന്റെ മകനെ സ്‌കൂളിലെ അധ്യാപകര്‍ നോട്ടമിട്ടിരുന്നുവെന്നുവെന്നും വിദ്യാര്‍ത്ഥിയുടെ മാതാവ് പരാതിപ്പെടുന്നു. കുട്ടിയുടെ ചെവിക്കല്ലിന് മാരകമായ ക്ഷതം ഏറ്റിട്ടുണ്ടെന്നും കേള്‍വിശക്തി തിരിച്ചുകിട്ടാനുള്ള സാധ്യത വളരെ കുറവാണെന്നും ഡോക്ടര്‍മാര്‍ പറയുന്നു.
അധ്യാപികക്കെതിരെ അടിയന്തര അന്വേഷണം നടത്തുമെന്ന് സ്‌കൂള്‍ പ്രിന്‍സിപ്പല്‍ അജയ് പാല്‍ സിംഗ് പറഞ്ഞു.