മഹാരാഷ്ട്രയില്‍ തിരഞ്ഞെടുപ്പ് ഫലം പുറത്തുവന്ന് മൂന്നാഴ്ച പിന്നിടുമ്പോള്‍ ദേവേന്ദ്ര ഫഡ്നാവിസ് മന്ത്രിസഭാ രൂപീകരണം പൂര്‍ത്തിയായി. 39 മന്ത്രിമാരാണ് ദേവേന്ദ്ര ഫഡ്നാവിസ് മന്ത്രിസഭയിലുള്ളത്. നാഗ്പൂര്‍ രാജ്ഭവനില്‍ സത്യപ്രതിജ്ഞ ചടങ്ങ് പൂര്‍ത്തിയായി. ബിജെപി സംസ്ഥാന അധ്യക്ഷന്‍ ചന്ദ്രശേഖര്‍ ബവന്‍കുലെയാണ് ആദ്യം സത്യപ്രതിജ്ഞ ചെയ്തത്.
സത്യപ്രതിജ്ഞ ചെയ്ത 39 മന്ത്രിമാരില്‍ 19 പേരും ബിജെപിയില്‍ നിന്നുള്ളവരാണ്. ശിവസേനയില്‍ നിന്ന് 11 എംഎല്‍എമാരും 9 എന്‍സിപി എംഎല്‍എമാരും മന്ത്രിമാരായി. മുഖ്യമന്ത്രി ദേവേന്ദ്രഫഡ്നാവിസ്, ഉപമുഖ്യമന്ത്രിമാരായ ഏക്നാഥ് ഷിന്‍ഡെ, അജിത് പവാര്‍ എന്നിവരുടെ സാന്നിധ്യത്തിലായിരുന്നു ചടങ്ങ്.
ബവന്‍കുലെയ്ക്ക് പുറമേ രാധാകൃഷ്ണ വിഖെ പാട്ടീല്‍, ആശിഷ് ഷെലാര്‍, ചന്ദ്രകാന്ത് പാട്ടീല്‍, ഗിരീഷ് മഹാജന്‍, ഗണേഷ് നായിക്, മംഗള്‍ പ്രതാപ് ലോധ, ജയ്കുമാര്‍ റാവല്‍, പങ്കജ മുണ്ട, അതുല്‍ സാവെ എന്നിവരാണ് സത്യപ്രതിജ്ഞ ചെയ്ത ബി.ജെ.പി മന്ത്രിമാര്‍.
ശിവസേനയില്‍നിന്ന് ദാദാ ഭൂസെ, ശംഭുരാജ് ദേശായി, സഞ്ജയ് റാത്തോഡ്, ഗുലാബ്രാവു പാട്ടീല്‍, ഉദയ് സാമന്ത് എന്നിവരും മന്ത്രിമാരായി സത്യപ്രതിജ്ഞ ചെയ്തു. എന്‍സിപി നേതാക്കളായ മണിക്റാവു കൊക്കാട്ടെ, ദത്താത്രയ് വിതോബ ഭാര്‍നെ, ഹസന്‍ മുഷ്രിഫ്, അദിതി സുനില്‍ തത്കരെ, ധനഞ്ജയ് മുണ്ടെ എന്നിവര്‍ ചടങ്ങില്‍ സത്യപ്രതിജ്ഞ ചെയ്തു.
