പുനൈയിലെ വിനോദ സഞ്ചാരകേന്ദ്രത്തില് പാലം തകര്ന്നുവീണ് ആറ് പേര് മരിച്ചു. ഞായറാഴ്ച വൈകുന്നേരം ഇന്ദ്രായണി നദിക്ക് കുറുകെയുള്ള പാലമാണ് തകര്ന്നത്. ഇരുപതിലേറെ വിനോദസഞ്ചാരികള് ഒഴുക്കില്പ്പെട്ടതായും റിപ്പോര്ട്ടുകളുണ്ട്. വിനോദ സഞ്ചാരികള് പാലത്തില് നിന്ന് പ്രകൃതിഭംഗി ആസ്വദിക്കുന്നതിനിടെയാണ് അപകടം.
പുനെയ്ക്ക് സമീപം കുന്ദ്മാല വിനോദസഞ്ചാരകേന്ദ്രത്തിലാണ് അപകടം നടന്നത്. പുഴയുടെ മധ്യഭാഗത്താണ് പാലം വീണത്. ഇവിടെ ശക്തമായ ഒഴുക്കുമുണ്ട്. ആറുപേരെ രക്ഷപ്പെടുത്തിയെന്നും വിവരമുണ്ട്. ഒഴുക്കില്പ്പെട്ടവരെ രക്ഷിക്കാനുള്ള ശ്രമങ്ങള് തുടരുകയാണ്. ദേശീയ ദുരന്തനിവാരണസേന, അഗ്നിരക്ഷാസേന, പൊലീസ് എന്നിവരുടെ നേതൃത്വത്തില് രക്ഷാപ്രവര്ത്തനം തുടരുന്നു.