രാജ്യം മുഴുവന്‍ ബി.ജെ.പി തരംഗം സൃഷ്ടിക്കുകയാണെന്ന് പാര്‍ട്ടി സംസ്ഥാന അധ്യക്ഷന്‍ കെ സുരേന്ദ്രന്‍. അടുത്ത നിയമസഭാ തിരഞ്ഞെടുപ്പിൽ കേരളത്തിലും ബി.ജെ.പി അധികാരത്തിലെത്തുമെന്ന് കെ.സുരേന്ദ്രൻ പറഞ്ഞു. ഇടത്- വലത് മുന്നണികള്‍ക്ക് എതിരെ അതിശക്തമായ വിധിയെഴുത്ത് കേരളത്തിലുമുണ്ടാകുമെന്നതിന്റെ തെളിവാണ് ബിഹാര്‍ തിരഞ്ഞെടുപ്പ് ഫലം എന്ന് സുരേന്ദ്രൻ ഡൽഹിയിൽ മാധ്യമങ്ങളോട് പറഞ്ഞു. നരേന്ദ്ര മോദിയിലുള്ള വിശ്വാസം ജനങ്ങളില്‍ ഒരോ ദിവസവും വര്‍ധിക്കുന്നുവെന്നും സുരേന്ദ്രന്‍ പറഞ്ഞു.
ബിജെപി കേരളത്തിലും പശ്ചിമ ബംഗാളിലും അധികാരം നേടും. ബിഹാറിലും മറ്റു സംസ്ഥാനങ്ങളിലും നടന്ന ഉപതിരഞ്ഞെടുപ്പുകളിലും പ്രവചനങ്ങളെ മറികടന്ന് ബിജെപി നേട്ടമുണ്ടാക്കി.എന്ന് സുരേന്ദ്രൻ പറഞ്ഞു. കേരളത്തിലെ ഇടത് സർക്കാരിന്റെ നില പരുങ്ങലിലാണ്. ഇടതുമുന്നണിയും യു.ഡി.എഫും അഴിമതിക്കാരാണെന്ന് തെളിഞ്ഞതായും സുരേന്ദ്രൻ പറഞ്ഞു.
മുഖ്യമന്ത്രിയുടെ ഓഫീസ് നടത്തിയിട്ടുള്ള എല്ലാ അഴിമതികളും അറിയാവുന്ന മുഖ്യമന്ത്രിയുടെ അഡീഷണൽ പ്രൈവറ്റ് സെക്രട്ടറി സി.എം രവീന്ദ്രന്റെ ജീവന് ഭീഷണിയുണ്ടെന്ന് കെ.സുരേന്ദ്രൻ പറഞ്ഞു.
സി.പി.എം എന്തും ചെയ്യാൻ മടിക്കാത്തവരാണ്, സി.എം രവീന്ദ്രന്റെ ജീവന് സുരക്ഷ നൽകേണ്ടത് സർക്കാരിന്റെ ഉത്തരവാദിത്ത്വമാണ്. തന്റെ ബോധ്യത്തിന്റെ അടിസ്ഥാനത്തിൽ പൊതുസമൂഹത്തിന്റെ അറിവിലേക്കാണ് താൻ ഇത് പറയുന്നതെന്നും കെ.സുരേന്ദ്രൻ പറഞ്ഞു.
