ഗാന്ധിജിയുടെ നെഞ്ചില് നിറയൊഴിച്ച നാഥുറാം വിനായക് ഗോഡ്സെയാണ് സ്വതന്ത്ര ഇന്ത്യയിലെ ആദ്യത്തെ ഭീകരവാദിയെന്ന കമല്ഹാസന്റെ പരാമര്ശത്തിനെതിരെ ബിജെപി. മതത്തിന്റെ പേരില് സമൂഹത്തില് ഭിന്നിപ്പുണ്ടാക്കാനാണ് അദ്ദേഹം ശ്രമിക്കുന്നതെന്ന് ബിജെപി ആരോപിച്ചു. കമല്ഹാസനെ അറസ്റ്റ് ചെയ്യണമെന്നും തിരഞ്ഞെടുപ്പ് പെരുമാറ്റ ചട്ടലംഘനത്തിന് കമല് ഹാസനെതിരെ നടപടിയെടുക്കണമെന്നും ബിജെപി, തിരഞ്ഞെടുപ്പ് കമ്മീഷനോട് ആവശ്യപ്പെട്ടു.
ഉപതിരഞ്ഞെടുപ്പില് ന്യൂനപക്ഷ വോട്ടുകള് സമാഹരിക്കാന് അപകടകരമായ തീക്കളിയാണ് കമല്ഹാസന് നടത്തുന്നതെന്ന് ബിജെപി തമിഴ്നാട് അധ്യക്ഷ തമിഴ്സൈ സൗന്ദര്രാജന് ആരോപിച്ചു. വിശ്വരൂപം സിനിമ പ്രദര്ശിപ്പിക്കാനായില്ലെങ്കില് രാജ്യം വിടുമെന്ന് ഭീഷണി മുഴക്കിയ ആളാണ് ഇപ്പോള് താന് യഥാര്ത്ഥ ഇന്ത്യക്കാരനാണെന്ന് വീമ്പിളക്കുന്നതെന്നും സൗന്ദര് രാജന് പരിഹസിച്ചു.
വെള്ളിത്തിരയിലെ അവസരങ്ങള് കുറഞ്ഞപ്പോള് കമല്ഹാസന് രാഷ്ട്രീയത്തില് അഭിനയിക്കാന് ഇറങ്ങിയിരിക്കുകയാണെന്നും അവര് പരിഹസിച്ചു.
കമല്ഹാസന് നടത്തിയ വിദ്വേഷ പ്രസംഗത്തില് തിരഞ്ഞെടുപ്പ് കമ്മീഷന് നടപടിയെടുക്കുമെന്ന് പ്രതീക്ഷിക്കുന്നതായും അവര് ട്വീറ്റ് ചെയ്തു.