നാല് സംസ്ഥാനങ്ങളിലെ നിയമസഭാതെരഞ്ഞെടുപ്പ് ഫലം പുറത്തുവന്നപ്പോൾ മൂന്നിടത്തും വിജയക്കൊടിപാറിച്ച് ബിജെപിയുടെ മാജിക്. ഏറെ പ്രതീക്ഷകളോടെ പോരിനിറങ്ങിയ കോൺഗ്രസിന് തെലങ്കാനയിലെ വിജയം കൊണ്ട് തൃപ്തിപ്പെടേണ്ടി വന്നു. ലോക്സഭാ തെരഞ്ഞെടുപ്പിന്റെ സെമിഫൈനൽ എന്ന് വിശേഷിപ്പിക്കപ്പെട്ട സംസ്ഥാന നിയമസഭാ തെരഞ്ഞെടുപ്പുകളിൽ തിളങ്ങും ജയമാണ് ബിജെപി സ്വന്തമാക്കിയത്.
മധ്യപ്രദേശിലും രാജസ്ഥാനിലും ചത്തീസ്ഗഢിലും മികച്ച ഭൂരിപക്ഷത്തോടെ ബിജെപി അധികാരമുറപ്പിച്ചപ്പോള് തെലങ്കാനയിൽ ബിആർഎസിനെ വീഴ്ത്തി മിന്നും ജയം നേടാനായത് മാത്രമാണ് കോൺഗ്രസിന് ആശ്വാസമായത്. മധ്യപ്രദേശില് ബിജെപിക്ക് ഭരണത്തുടര്ച്ചയുണ്ടായപ്പോള് രാജസ്ഥാനിലും ഛത്തീസ്ഗഡിലും കോണ്ഗ്രസില്നിന്ന് അധികാരം തിരിച്ചുപിടിച്ചാണ് ബിജെപി ശക്തി കാണിച്ചത്.
തെരഞ്ഞെടുപ്പ് ഫലം പുറത്ത് വന്നതോടെ ഇനി ബിജെപി ചർച്ചകൾ മുഖ്യമന്ത്രിമാർക്കുവേണ്ടിയാണ്.രാജസ്ഥാനിൽ വസുന്ധരയടക്കം നിരവധി പേരുകളാണ് പരിഗണനയിലുള്ളത്. വസുന്ധരക്ക് പുറമെ ബാബ ബാലക് നാഥ്, ഗജേന്ദ്ര സിങ് ശെഖാവത്, ദിയ കുമാരി തുടങ്ങിയ നേതാക്കളുടെ പേരുകളും ബിജെപി നേതൃത്വത്തിന്റെ പരിഗണനയിലുണ്ട്.
മധ്യപ്രദേശിൽ ചൗഹാനും കൈലാഷ് വിജയ് വർഗീയയും പരിഗണനയിലുണ്ട്. ഇവര്ക്ക് പുറമെ പ്രഹ്ലാദ് പട്ടേലിന്റെ പേരും ചര്ച്ചയിലുണ്ടെന്നാണ് വിവരം. ഛത്തീസ്ഗഡിൽ രമൺസിംഗിനാണ് മുഖ്യമന്ത്രി സ്ഥാനത്തിനുള്ള സാധ്യത. രമണ് സിംഗിന് പുറമെ അരുണ് സാഹോ, രേണുക സിംഗ്, ഒപി ചൗധരി തുടങ്ങിയ പേരുകളും മുഖ്യമന്ത്രി സ്ഥാനത്തേക്ക് ഉയര്ന്നുകേള്ക്കുന്നുണ്ട്.
അതേ സമയയം കോൺഗ്രസിന് ആശ്വാസ ജയം സമ്മാനിച്ച തെലങ്കാനയിൽ രേവന്ത് റെഡ്ഢി തന്നെ മുഖ്യമന്ത്രിയാകാനാണ് സാധ്യത. രേവന്ത് റെഡ്ഡിക്ക് പുറമെ മല്ലു ഭട്ടി വിക്രമാര്ക്കയുടെ പേരും പരിഗണിക്കുന്നതായി സൂചനയുണ്ട്.രേവന്ത് റെഡ്ഡിക്കുള്ള ജനസമ്മതി കണക്കിലെടുത്ത് അദ്ദേഹത്തെ തന്നെ മുഖ്യമന്ത്രിയാക്കാനാണ് കൂടുതൽ സാധ്യത.