ലഖിംപൂര്ഖേരിയിലെ കര്ഷക കൂട്ടക്കൊല കേസിലെ മുഖ്യപ്രതിയായ ആശിഷ് മിശ്ര കീഴടങ്ങി. കേന്ദ്രമന്ത്രി അജയ് മിശ്രയുടെ മകനായ ആശിഷ് മിശ്രയുടെ ജാമ്യം കഴിഞ്ഞ ആഴ്ച സുപ്രീംകോടതി റദ്ദാക്കുകയും ഒരാഴ്ചയ്ക്കുള്ളില് കീഴടങ്ങാന് നിര്ദ്ദേശിക്കുകയും ചെയ്തിരുന്നു. ഇതേ തുടര്ന്നാണ് ഇന്ന് പൊലീസിന് മുന്നില് കീഴടങ്ങിയത്.
ആശിഷ് മിശ്രയുടെ ജാമ്യം റദ്ദാക്കണമെന്ന് ആവശ്യപ്പെട്ട് കൊല്ലപ്പെട്ട കര്ഷകരുടെയും മാധ്യമപ്രവര്ത്തകന്റെയും കുടുംബങ്ങള് സമര്പ്പിച്ച ഹര്ജി പരിഗണിച്ച് ചീഫ് ജസ്റ്റിസ് എന് വി രമണ അധ്യക്ഷനായ ബെഞ്ചാണ് ജാമ്യം റദ്ദാക്കിയത്. ഫെബ്രുവരി 10ന് അലഹാബാദ് ഹൈക്കോടതിയാണ് ആശിഷ് മിശ്രയ്ക്ക് ജാമ്യം അനുവദിച്ചത്.
2021 ഒക്ടോബര് 3-ന് ലഖിംപൂര് ഖേരിയില് പ്രതിഷേധം നടത്തുകയായിരുന്ന കര്ഷകര്ക്ക് നേരെ ആശിഷ് മിശ്ര വാഹനമോടിച്ചു കയറ്റുകയായിരുന്നു. സംഭവത്തില് നാല് കര്ഷകരും ഒരു മാധ്യമപ്രവര്ത്തകനും ഉള്പ്പെടെ എട്ട് പേരാണ് മരിച്ചത്.