ജമ്മു കശ്മീരിലെ പുല്വാമയില് ഭീകരര് നടത്തിയ വെടിവയ്പ്പില് ഉത്തര്പ്രദേശ് സ്വദേശിയായ തൊഴിലാളി കൊല്ലപ്പെട്ടു. യുപി സ്വദേശിയായ മുകേഷാണ് ഭീകരരുടെ വെടിയേറ്റ് കൊല്ലപ്പെട്ടത്. ഭീകരര് നടത്തിയ വെടിവയ്പ്പില് ഗുരുതരമായി പരിക്കേറ്റ മുകേഷ് ചികിത്സയിലിരിക്കെയാണ് മരിച്ചത്. ഭീകരാക്രമണത്തെ കുറിച്ചുള്ള കൂടുതല് വിവരങ്ങള് ലഭ്യമല്ല.
അതേ സമയം ആക്രമണം നടന്ന സ്ഥലം ഉള്പ്പെടെയുള്ള പ്രദേശത്ത് നിരീക്ഷണം ശക്തമാക്കിയതായി കശ്മീര് പൊലീസ് അറിയിച്ചു. കഴിഞ്ഞ ദിവസം ശ്രീനഗറില് നടന്ന ഭീകരാക്രമണത്തില് പൊലീസ് ഉദ്യോഗസ്ഥന് വെടിയേറ്റിരുന്നു. കുട്ടികള്ക്കൊപ്പം മൈതാനത്ത് ക്രിക്കറ്റ് കളിക്കുന്നതിനിടെ ഇന്സ്പെക്ടര് മസ്റൂര് അഹമ്മദ് വാനിക്കാണ് വെടിയേറ്റത്. ഒന്നിലധികം വെടിയേറ്റ ഇന്സ്പെക്ടര് മസ്റൂര് അഹമ്മദ് നിലവില് തീവ്ര പരിചരണ വിഭാഗത്തില് ചികിത്സയിലാണ്.
ഇതിന് പിന്നാലെയാണ് യുപി സ്വദേശിയുടെ മരണത്തിനിടയാക്കിയ ആക്രമണം നടന്നത്. കഴിഞ്ഞ ദിവസത്തെ ആക്രമണത്തിന് പിന്നാലെ സുരക്ഷാ സേന അതീവ ജാഗ്രതയിലായിരുന്നു. കുപ്വാര ജില്ലയില് നിയന്ത്രണ രേഖ മറികടന്ന് നുഴഞ്ഞ് കയറാന് ശ്രമിച്ച ഭീകരനെ സുരക്ഷാ സേന വധിച്ചതായി അധികൃതര് വ്യക്തമാക്കി.