ഉത്തര്‍പ്രദേശില്‍ എഎന്‍ഐ മാധ്യമ പ്രവര്‍ത്തകനെ അക്രമികള്‍ വീട്ടില്‍ കയറി കുത്തി കൊലപ്പെടുത്തി. എഎന്‍ഐ മാധ്യമ പ്രവര്‍ത്തകന്‍ ദിലീപ് സൈനി ആണ് കൊല്ലപ്പെട്ടത്. ഉത്തര്‍പ്രദേശിലെ ഫത്തേപൂര്‍ ജില്ലയിലെ ബിതോറ റോഡില്‍ സ്ഥിതി ചെയ്യുന്ന ബിസൗലിയില്‍ ബുധനാഴ്ച രാത്രിയാണ് ദാരുണ സംഭവം അരങ്ങേറിയത്.
ഭൂമിയെ ചൊല്ലിയുള്ള തര്‍ക്കമാണ് കൊലയ്ക്ക് പിന്നിലെന്നാണ് പുറത്തുവരുന്ന റിപ്പോര്‍ട്ടുകള്‍. സംഭവത്തില്‍ ദിലീപ് സൈനിയ്ക്ക് ഒപ്പമുണ്ടായിരുന്ന ഒരാള്‍ക്ക് ആക്രമണത്തില്‍ പരിക്കേറ്റിട്ടുണ്ട്. പരിക്കേറ്റ ഷാഹിദിനെ കാണ്‍പൂരിലെ ഹാലെറ്റ് ആശുപത്രിയില്‍ പ്രവേശിപ്പിച്ചു. ദിലീപ് സൈനി ഫത്തേപ്പൂരിലും ലഖ്‌നൗവിലും റിയല്‍ എസ്റ്റേറ്റ് ബിസിനസ് നടത്തിയിരുന്നു.
ബുധനാഴ്ച രാത്രി ഷാഹിദിനൊപ്പം വീട്ടിലിരുന്ന സൈനിയെ വീട്ടില്‍ അതിക്രമിച്ച് കയറിയ 16ല്‍ അധികം അക്രമികള്‍ ആക്രമിക്കുകയായിരുന്നു. ദിലീപിന് ആക്രമണത്തില്‍ കുത്തേറ്റിരുന്നു. തുടര്‍ന്ന് സൈനിയുടെ വീടിന് മുന്നില്‍ പാര്‍ക്ക് ചെയ്തിരുന്ന വാഹനങ്ങളും തകര്‍ത്ത ശേഷമായിരുന്നു അക്രമി സംഘത്തിന്റെ മടക്കം.
പ്രദേശത്താകെ അക്രമികള്‍ പരിഭ്രാന്തി സൃഷ്ടിച്ചിരുന്നു. സംഭത്തില്‍ 16 പേര്‍ക്കെതിരെ പൊലീസ് കേസെടുത്തിട്ടുണ്ട്. ഇതില്‍ 9 പേരെ ഇതോടകം തിരിച്ചറിഞ്ഞതായി പൊലീസ് വ്യക്തമാക്കി.
