കേന്ദ്രസര്ക്കാരിന്റെ സൈനിക റിക്രൂട്ട്മെന്റ് പദ്ധതിയായ അഗ്നിപഥിന് എതിരെ ഡിവൈഎഫ്ഐ നടത്തിയ പ്രതിഷേധ മാര്ച്ചില് സംഘര്ഷം. ഡല്ഹി ജന്തര്മന്ദറില് നിന്ന് പാര്ലമെന്റിലേക്ക് നടത്തിയ മാര്ച്ചിലാണ് സംഘര്ഷമുണ്ടായത്. എ എ റഹീം ഉള്പ്പെടെയുള്ള നേതാക്കളെ പൊലീസ് അറസ്റ്റ് ചെയ്ത് നീക്കി. എ എ റഹീമിനെ കൂടാതെ ഐഷെ ഘോഷ്, ഹിമംഗ രാജ് ഭട്ടാചാര്യ എന്നിവരടക്കമുള്ള നേതാക്കളെ പൊലീസ് വലിച്ചിഴച്ചാണ് അറസ്റ്റ് ചെയ്തത്.
മാര്ച്ച് പൊലീസ് തടഞ്ഞതിനെ തുടര്ന്നാണ് സംഘര്ഷമുണ്ടായത്. മാധ്യമപ്രവര്ത്തകര്ക്കുനേരെയും അതിക്രമം ഉണ്ടായി. പൊലീസ് ഒരാളുടെ കരണത്തടിച്ചു. എം പിയാണെന്ന പരിഗണന പോലുമില്ലാതെ പൊലീസ് ബലം പ്രയോഗിക്കുകയായിരുന്നു. ജനാധിപത്യ രീതിയിലുള്ള പ്രതിഷേധത്തെ അടിച്ചമര്ത്തി. എന്നാല് ഡിവൈഎഫ്ഐ ശക്തമായ പ്രതിഷേധം തുടരുമെന്നും റഹീം പറഞ്ഞു.
പദ്ധതിക്ക് എതിരെ രാജ്യവ്യാപകമായി പ്രതിഷേധം തുടരുന്ന സാഹചര്യത്തിലും പദ്ധതിയുമായി മുന്നോട്ട് പോകാനാണ് കേന്ദ്ര സര്ക്കാരിന്റെ തീരുമാനം. റിക്രൂട്ട്മെന്റ്് സംബന്ധിച്ച വിവരങ്ങള് വ്യോമസേന പുറത്ത് വിട്ടു. ശമ്പളം, പ്രായപരിധി, വിദ്യാഭ്യാസ യോഗ്യത എന്നിവയടക്കമുള്ള വിവരങ്ങളാണ് പുറത്തു വിട്ടിരിക്കുന്നത്.
17.5 വയസിനും 21 വയസിനും ഇടയില് പ്രായമുള്ളവരെയാണ് പദ്ധതിയിലേക്ക് പരിഗണിക്കുക. മെഡിക്കല് യോഗ്യതാ വ്യവസ്ഥകള് പാലിക്കേണ്ടതുണ്ടെന്നും അറിയിപ്പില് പറയുന്നു. 18 വയസില് താഴെ പ്രായമുള്ളവര് രക്ഷിതാക്കള് ഒപ്പിട്ട അനുമതി പത്രം നല്കണം. നാലുവര്ഷത്തേയ്ക്കാണ് നിയമനം. വ്യോമസേന നിര്ദേശിക്കുന്ന ഏത് ജോലിയും നിര്വഹിക്കാന് പദ്ധതിയില് അഗംമാകുന്നവര് തയ്യാറാകണം.
കാലാവധി കഴിഞ്ഞാല് വ്യോമസേനയില് സ്ഥിരം നിയമനത്തിന് അപേക്ഷിക്കുന്നതിന് മുന്ഗണന ലഭിക്കും. 25 ശതമാനം സീറ്റ് അഗ്നിവീരന്മാര്ക്ക് നീക്കിവെയ്ക്കുമെന്നും മാര്ഗരേഖയില് പറഞ്ഞിട്ടുണ്ട്. എയര്മാന് തസ്തികയിലാണ് സ്ഥിരം നിയമനം ലഭിക്കുക. ആദ്യ വര്ഷം 30,000 രൂപയും രണ്ടാമത്തെ വര്ഷം 33,000 രൂപയും മൂന്നാമത്തെ വര്ഷം 36,500 രൂപയും നാലാമത്തെ വര്ഷം 40,000 രൂപയുമാണ് ശമ്പളം.
പ്രതിവര്ഷം 30 ദിവസത്തെ വാര്ഷിക അവധി ലഭിക്കും. അസാധാരണമായ സാഹചര്യത്തിലൊഴികെ, റിക്രൂട്ട് ചെയ്യുന്നവര്ക്ക് സ്വന്തം നിലയില് സേവനം മതിയാക്കി തിരിച്ചുപോകാന് കഴിയില്ല. 13 ലക്ഷത്തോളം വരുന്ന സായുധ സേനയെ കാര്യക്ഷമമാക്കുക എന്നതാണ് പദ്ധതിയിലൂടെ ലക്ഷ്യമിടുന്നതെന്നാണ് കേന്ദ്ര സര്ക്കാരിന്റെ അവകാശവാദം. അതേസമയം നാലു വര്ഷത്തെ സേവനം പൂര്ത്തിയാക്കി പുറത്തിറങ്ങുന്നവര്ക്ക് പെന്ഷന് ലഭിക്കില്ലെന്നും അറിയിപ്പില് വ്യക്തമാക്കിയിട്ടുണ്ട്.