വരാനിരിക്കുന്ന ഡൽഹി നിയമസഭാ തിരഞ്ഞെടുപ്പിലെ ആദ്യ സ്ഥാനാർത്ഥികളുടെ പട്ടിക ആം ആദ്മി പാർട്ടി ഉടൻ പുറത്തു വിടുമെന്ന് സൂചന. ഭരണകക്ഷിയായ ആം ആദ്മി പാർട്ടി നിരവധി സിറ്റിംഗ് എംഎൽഎമാരെ സ്ഥാനാർത്ഥികളുടെ പട്ടികയിൽ നിന്നും ഒഴിവാക്കി കൊണ്ട് പട്ടികയിൽ മാറ്റം വരുത്താൻ സാദ്ധ്യതയുണ്ട്.
അതിഷി മർലീനയെ ആം ആദ്മി പാർട്ടി കൽക്കാജി നിയോജകമണ്ഡലത്തിൽ നിന്ന് രംഗത്തിറക്കാന് സാദ്ധ്യതയുണ്ടെന്നും രാഘവ് ചദ്ദ രാജേന്ദ്ര നഗറിൽ നിന്ന് മത്സരിക്കാമെന്നുമാണ് പാർട്ടി വൃത്തങ്ങൾ നൽകുന്ന സൂചന. ഫെബ്രുവരി എട്ടിന് നടക്കാനിരിക്കുന്ന ഡൽഹി തിരഞ്ഞെടുപ്പിനായുള്ള ആം ആദ്മി സ്ഥാനാർത്ഥികളുടെ ആദ്യ പട്ടികയിൽ 70 പേരുകളുണ്ടാകും.
അതിഷി, രാഘവ് ചദ്ദ എന്നിവരെ കൂടാതെ തിമർപൂരിൽ നിന്നുള്ള ദിലീപ് പാണ്ഡെ, കരവാൽ നഗറിൽ നിന്നുള്ള ദുർഗേഷ് പഥക് എന്നിവരും മത്സരിച്ചേക്കും. സീറ്റുകൾ ലഭിക്കാൻ സാദ്ധ്യത ഇല്ലാത്ത സിറ്റിംഗ് എംഎൽഎമാരിൽ ദ്വാരകയിൽ നിന്നുള്ള ആദർശ് ശാസ്ത്രി ഹരി നഗറിൽ നിന്നുള്ള ജഗദീപ് സിംഗ് ബദർപൂരിൽ നിന്നുള്ള നാരായൺ ദത്ത് ശർമ ഡൽഹി കാന്റിൽ നിന്നുള്ള കമാൻഡോ സുരേന്ദ്ര സിംഗ് എന്നിവർ ഉൾപ്പെടുന്നു.
കോൺഗ്രസിൽ നിന്ന് ആം ആദ്മി പാർട്ടിയിൽ ചേർന്ന ഷോയിബ് ഇക്ബാലിനെ ഉൾക്കൊള്ളിക്കാൻ മാതിയ മഹലിൽ നിന്നുള്ള സിറ്റിംഗ് എംഎൽഎ അസീം അഹമ്മദ് ഖാനെ ഒഴിവാക്കിയേക്കും.
ഡൽഹി മുഖ്യമന്ത്രിയും ആം ആദ്മി പാർട്ടി മേധാവിയുമായ അരവിന്ദ് കെജ്രിവാൾ, മനീഷ് സിസോദിയ, പാർട്ടിയുടെ ഡൽഹി ചുമതലയുള്ള സഞ്ജയ് സിംഗ്, സംസ്ഥാന പാർട്ടി പ്രസിഡന്റ് ഗോപാൽ റായ് തുടങ്ങിയവർ പങ്കെടുക്കുന്ന രാഷ്ട്രീയകാര്യ സമിതി യോഗത്തിൽ സ്ഥാനാർത്ഥികളുടെ പട്ടിക അന്തിമമാക്കും.