തമിഴ്നാട്ടിലെ തിരുച്ചിറപ്പള്ളിയില് മലയാളി യുവാവിനെ ജനക്കൂട്ടം മർദ്ദിച്ചു കൊന്നു. തിരുവനന്തപുരം മലയന്കീഴ് സ്വദേശി ദീപു (25) വാണ് കൊല്ലപ്പെട്ടതെന്ന് മാതൃഭൂമി റിപ്പോർട്ട് ചെയ്തു. ദീപുവിന്റെ സുഹൃത്ത് അരവിന്ദ് പരിക്കുകളോടെ ആശുപത്രിയില് ചികിത്സയിലാണ്. മോഷ്ടാക്കളെന്ന് ആരോപിച്ചാണ് ദീപുവിനേയും അരവിന്ദിനേയും ജനക്കൂട്ടം മര്ദ്ദിച്ചത്. തിരുച്ചിറപ്പള്ളിക്ക് സമീപം അല്ലൂരിലാണ് സംഭവം.
മോഷ്ടാക്കളെന്ന് ആരോപിച്ച് ഒരു സംഘം ഗ്രാമവാസികള് ഇരുവരേയും ഇന്നലെ ആക്രമിക്കുകയായിരുന്നു. വീട് കുത്തിത്തുറന്ന് മോഷ്ടിക്കാന് ശ്രമിച്ചുവെന്ന് ആരോപിച്ച് ജനക്കൂട്ടം ഇരുവരേയും തടഞ്ഞുവെയ്ക്കുകയും പിന്നീട് മർദ്ദിക്കുകയുമായിരുന്നു. ആക്രമണത്തില് ഗുരുതരമായി പരിക്കേറ്റ ഇരുവരേയും പൊലീസ് എത്തിയാണ് ആശുപത്രിയിലേക്ക് മാറ്റിയത്.
മഹാത്മാ ഗാന്ധി മെമ്മോറിയല് സർക്കാർ ആശുപത്രിയില് പ്രവേശിപ്പിച്ച ദീപു മരിച്ചതായി ആശുപത്രി അധികൃതര് സ്ഥിരീകരിച്ചു. ആശുപത്രിയില് ചികിത്സയിലുള്ള അരവിന്ദിന്റെ ആരോഗ്യ നിലയില് നിലവിൽ പ്രശ്നങ്ങളില്ലെന്നും ആശുപത്രി അധികൃതര് പറഞ്ഞു.
ദീപുവും അരവിന്ദും മോഷണത്തിന് ശ്രമിച്ചോ എന്ന കാര്യം പൊലീസ് സ്ഥിരീകരിച്ചിട്ടില്ല. സംഭവത്തില് പൊലീസ് കേസ് രജിസ്റ്റര് ചെയ്തിട്ടില്ല എന്നാണ് റിപ്പോർട്ട്. അതേസമയം സംഭവവുമായി ബന്ധപ്പെട്ട് ചിലരെ കസ്റ്റഡിയില് എടുത്തിട്ടുണ്ട്. എന്തിനാണ് ദീപുവും അരവിന്ദും തിരുച്ചിറപ്പള്ളിയില് എത്തിയത് എന്ന കാര്യത്തിലും പൊലീസ് വിശദീകരണം നല്കിയിട്ടില്ല. ആള്ക്കൂട്ട അക്രമണമാണെന്നാണ് പൊലീസ് പ്രാഥമികമായി കരുതുന്നത്.