കഴിഞ്ഞ അഞ്ച് ദിവസത്തിനിടെ ആറ് കുട്ടികൾ ചന്ദിപുര വൈറസ് ബാധയെ തുടർന്ന് മരിച്ചതായി ഗുജറാത്ത് ആരോഗ്യ മന്ത്രി റുഷികേശ് പട്ടേൽ. ആകെ കേസുകളുടെ എണ്ണം 12 ആയി ഉയർന്നു. സബർകാന്ത ജില്ലയിലെ ഹിമത്നഗറിലെ സിവിൽ ആശുപത്രിയിലാണ് ഏറ്റവും കൂടുതൽ മരണങ്ങൾ സംഭവിച്ചത്. അതേസമയം 12 പേർ ചികിത്സയിലുണ്ടന്നും ആരോഗ്യമന്ത്രി അറിയിച്ചു.
സംസ്ഥാനത്ത് സംശയാസ്പദമായ 12 കേസുകൾ റിപ്പോർട്ട് ചെയ്യപ്പെട്ടിട്ടുണ്ടെന്നും ആരോഗ്യമന്ത്രി അറിയിച്ചു. ഈ 12 രോഗികളിൽ നാല് പേർ സബർകാന്ത ജില്ലയിൽ നിന്നും, മൂന്ന് ആരവല്ലിയിൽ നിന്നും, ഒരാൾ വീതവും മഹിസാഗർ, ഖേഡ എന്നിവിടങ്ങളിൽ നിന്നുമുള്ളവരാണ്. രണ്ട് രോഗികൾ രാജസ്ഥാനിൽ നിന്നും ഒരാൾ മധ്യപ്രദേശിൽ നിന്നുമാണ്. ഇവർ ഗുജറാത്തിൽ ചികിത്സയിലാണ്. അതേസമയം സബർകാന്തയിൽ നിന്നുള്ള എട്ടെണ്ണം ഉൾപ്പെടെ 12 സാമ്പിളുകളും പരിശോധനയ്ക്കായി പൂനെയിലെ നാഷണൽ ഇൻസ്റ്റിറ്റ്യൂട്ട് ഓഫ് വൈറോളജിയിലേക്ക് അയച്ചിട്ടുണ്ടെന്നും മന്ത്രി പറഞ്ഞു.
ചന്ദിപുര ഒരു പുതിയ വൈറസല്ല. ഇത് പ്രധാനമായും 9 മാസം മുതൽ 14 വയസ്സുവരെയുള്ള കുട്ടികളെയാണ് ബാധിക്കുന്നത്, ഗ്രാമപ്രദേശങ്ങളിലാണ് ഇത് കൂടുതലായി കാണപ്പെടുന്നത്. പനി, ഛർദ്ദി, വയറിളക്കം, തലവേദന എന്നിവയാണ് രോഗലക്ഷണങ്ങൾ. ഈ ലക്ഷണങ്ങൾ കണ്ടാൽ ഒരു ഡോക്ടറെ സമീപിക്കണമെന്നും മന്ത്രി മുന്നറിയിപ്പ് നൽകി. 1965-ൽ മഹാരാഷ്ട്രയിലാണ് ഈ വൈറസ് ആദ്യമായി തിരിച്ചറിഞ്ഞത്. 2003-ൽ ആന്ധ്രാപ്രദേശിലും മഹാരാഷ്ട്രയിലും രോഗം ബാധിച്ച 329 കുട്ടികളിൽ 183 മരണത്തിന് കീഴടങ്ങുകയായിരുന്നു.