രാജ്യത്ത് കൊറോണ വൈറസ് രോഗവ്യാപനത്തിനിടെ ഡല്‍ഹിയില്‍ 108 ആശുപത്രി ജിവനക്കാരെ ക്വാറന്റൈന്‍ ചെയ്തു. ശ്രീ ഗംഗാ റാം ആശുപത്രിയിലെ ഡോക്ടര്‍മാരും നേഴ്‌സുമാരും ഉള്‍പ്പെടെയുള്ളവരെയാണ് രണ്ടു രോഗികളുമായി സമ്പർക്കത്തിലേർപ്പെട്ടതിനെ തുടർന്ന് ക്വാറന്റൈൻ ചെയ്തത്.
108 പേരില്‍ 85 പേരെ വീടുകളിലാണ് ക്വാറന്റൈന്‍ ചെയ്തിരിക്കുന്നത്. 23 പേരെ ആശുപത്രിയിലും നിരീക്ഷണത്തിലാക്കി. ഇതേ സമയം ഇന്ന് തമിഴ്നാട്ടിൽ 74 പേർക്ക് രോഗബാധ സ്ഥിരീകരിച്ചു. ഇതോടെ സംസ്ഥാനത്തെ ആകെ കൊവിഡ് ബാധിതരുടെ എണ്ണം 485 ആയി.
രോഗം സ്ഥിരീകരിച്ചവരില്‍ 73 പേര്‍ ദല്‍ഹിയില്‍ തബ്‌ലീഗ് സമ്മേളനം കഴിഞ്ഞ് എത്തിയവരാണ്. കേന്ദ്രഗവണ്‍മെന്റിന്റെ കണക്ക് പ്രകാരം 501 പേര്‍ മാത്രമാണ് തബ് ലീഗ് സമ്മേളനത്തില്‍ നിന്ന് തമിഴ്നാട്ടില്‍ എത്തിയത്. എന്നാല്‍ തമിഴ്നാട് ഗവണ്‍മെന്റ് പുറത്തുവിട്ട കണക്ക് പ്രകാരം 1500 പേര്‍ സമ്മേളനത്തില്‍ പങ്കെടുക്കുകയും 1135 പേര്‍ തിരികെ തമിഴ്നാട്ടില്‍ എത്തുകയും ചെയ്തിട്ടുണ്ട്.