മന്ത്രി ജെ. മെഴ്സിക്കുട്ടിയമ്മയ്ക്കും പൊലീസിനും നേരെ കൊലവിളി പ്രസംഗവുമായി യുവമോര്ച്ച സംസ്ഥാന സെക്രട്ടറി ശ്യാം രാജ്. മന്ത്രിയെയും മക്കളേയും, പൊലീസ് ഉദ്യോഗസ്ഥരുടെ ഭാര്യയേയും കുട്ടികളേയും തെരഞ്ഞ് പിടിച്ച് വീടു കയറി ആക്രമിക്കുമെന്നാണ് യുവമോർച്ചാ നേതാവ് ശ്യാംരാജിന്റെ ഭീഷണി. മന്ത്രിയുടെ വീട്ടിലേക്ക് നടത്തിയ മാർച്ചിലാണ് ശ്യാംരാജിന്റെ കൊലവിളി പ്രസംഗം.
മന്ത്രിയും പൊലീസുകാരും അവരുടെ വീട്ടുകാരും എവിടെയൊക്കെയാണെന്നും എപ്പോഴാണ് തിരിച്ച് വീട്ടിലേക്ക് വരുന്നതെന്നുമുള്ള മുഴുവന് വിവരങ്ങളും തങ്ങളുടെ പക്കലുണ്ട്. നിങ്ങളുടെ കുടുംബാംഗങ്ങൾ ജോലി ചെയ്യുന്നതെവിടെയാണ്, കുട്ടികൾ പഠിക്കുന്നത് എവിടെയാണെന്ന വിവരമെല്ലാം തങ്ങൾക്കറിയാം. യുവമോര്ച്ച പ്രവര്ത്തകരുടെ വീട്ടില് അകാരണമായി പൊലീസ് കയറുന്നുവെന്നും തിരിച്ച് അതേ നാണയത്തില് പ്രതികരിക്കുമെന്നും ശ്യാം രാജ് ഭീഷണി മുഴക്കി.
കെ.ടി ജലീല് രാജിവെയ്ക്കണമെന്ന് ആവശ്യപ്പെട്ട് കുണ്ടറയിലെ മന്ത്രി മെഴ്സിക്കുട്ടിയമ്മയുടെ ഓഫീസിലേക്ക് യുവമോർച്ച മാർച്ച് നടത്തിയിരുന്നു. ഈ മാര്ച്ച് ഉദ്ഘാടനം ചെയ്ത് സംസാരിക്കുന്നതിനിടെയാണ് ശ്യാംരാജ് പൊലീസ് കുടുംബാംഗങ്ങളുടെയും മന്ത്രിയുടെയും വീടാക്രമിക്കുമെന്ന് ഭീഷണി മുഴക്കി സംസാരിച്ചത്.
യുവമോര്ച്ചയുടെ ജില്ലാ പ്രസിഡന്റ് അടക്കമുള്ളവര്ക്കെതിരെ നേരത്തെ പൊലീസ് കേസെടുത്തിരുന്നു. മന്ത്രി കെ.ടി ജലീല് സഞ്ചരിച്ച കാറിനു കുറുകെ വണ്ടിയിട്ട് കരിങ്കൊടി കാണിച്ചതിനും അപകടപ്പെടുത്താൻ ശ്രമിച്ചതിനുമായിരുന്നു കേസ്. ഇതിന്റെ പശ്ചാത്തലത്തില് പ്രവർത്തകരുടെ വീടുകളില് പൊലീസ് റെയ്ഡ് നടത്തിയിരുന്നു. റെയ്ഡ് നടത്തിയാല് പൊലീസുകാരുടെ കുടുംബാംഗങ്ങള് ജോലി ചെയ്യുന്നതെവിടെയാണെന്നും കുട്ടികളെവിടെയാണ് പഠിക്കുന്നതെന്നും അറിയാമെന്നും പൊലീസുകാരുടെ വീടുകളിലെത്തുമെന്നുമുള്ള തരത്തിലുള്ള ഭീഷണി സന്ദേശമാണ് ശ്യാം രാജിന്റെ ഭാഗത്തു നിന്നുണ്ടായത്.
അതേസമയം, പ്രസംഗവുമായി ബന്ധപ്പെട്ട പരാതികളൊന്നും ലഭിച്ചിട്ടില്ല.