സമൂഹ മാധ്യമത്തില്‍ സാമുദായിക വിദ്വേഷം പരത്തുന്ന തരത്തില്‍ പ്രചാരണം നടത്തിയ യുവാവ് അറസ്റ്റില്‍. കാസര്‍ഗോഡ് ഉളിയത്തടുക്ക സ്വദേശി നൗഫലിനെയാണ് പൊലീസ് അറസ്റ്റ് ചെയ്തത്. ഇയാള്‍ക്കെതിരെ ഐപിസി 153 എ വകുപ്പ് പ്രകാരമാണ് കേസെടുത്തിരിക്കുന്നത്.
നൗഫലിന് പുറമെ മറ്റ് രണ്ട് പേര്‍ക്കെതിരെയും കേസെടുത്തിട്ടുണ്ട്. ഇവരെ അറസ്റ്റ് ചെയ്തിട്ടില്ല. അയോദ്ധ്യ വിധിയുടെ പശ്ചാത്തലത്തില്‍ ജില്ലയില്‍ ഏര്‍പ്പെടുത്തിയിരുന്ന നിരോധനാജ്ഞ ഇന്നലെ അര്‍ദ്ധരാത്രിയാണ് പിന്‍വലിച്ചത്. ശബരിമല വിധി നാളെ വരാനിരിക്കെ ജില്ലയില്‍ വീണ്ടും കനത്ത സുരക്ഷയും പട്രോളിംഗും ഏര്‍പ്പെടുത്തിയിട്ടുണ്ട്.
വിധിയുടെ മറവില്‍ ആരെങ്കിലും അക്രമപ്രവര്‍ത്തനങ്ങള്‍ക്കോ, വിദ്വേഷ പ്രചാരണങ്ങള്‍ക്കോ ശ്രമിച്ചാല്‍ കര്‍ശന നടപടിയെന്ന് പൊലീസ് വ്യക്തമാക്കി. വിധി ദുര്‍വ്യാഖ്യാനം ചെയ്ത് നവമാധ്യമങ്ങള്‍ വഴി തെറ്റായ പ്രചാരണം നടത്തുന്നവര്‍ക്കെതിരെയും നടപടിയുണ്ടാകുമെന്ന് പൊലീസ് പറഞ്ഞു.